କ୍ରୀଡ଼ା ନିର୍ଦ୍ଦେଶକ ଭାବେ ନିଯୁକ୍ତ ହେଲେ ଆଇଏଏସ ସିଦ୍ଧାର୍ଥ ଦାସ
ଭୁବନେଶ୍ୱର: ରାଜ୍ୟ ସରକାର ଅଫିସର କ୍ୟାଡରରେ ସାମାନ୍ୟ ଅଦଳବଦଳ କରିବା ସହ ଦୁଇ ଜଣ ଆଇଏଏସ୍ ଅଧିକାରୀଙ୍କୁ ନୂଆ ଦାୟିତ୍ୱ ଦେଇଛନ୍ତି। ସାଧାରଣ ପ୍ରଶାସନ ଓ ଜନ ଅଭିଯୋଗ ବିଭାଗ ପକ୍ଷରୁ ଜାରି ବିଜ୍ଞପ୍ତି ଅନୁଯାୟୀ ଆଇଏଏସ ସିଦ୍ଧାର୍ଥ ଦାସଙ୍କୁ କ୍ରୀଡ଼ା ନିର୍ଦ୍ଦେଶକ ଭାବେ ନିଯୁକ୍ତି ଦିଆଯାଇଛି, ସେହିପରି ଦୀପଙ୍କର ମହାପାତ୍ରଙ୍କୁ ଓଡ଼ିଶା କ୍ଷୁଦ୍ର ଶିଳ୍ପ ନିଗମ ଲିମିଟେଡ୍ (ଓଏସଆଇସି)ର ପରିଚାଳନା ନିର୍ଦ୍ଦେଶକ ଭାବେ ନିଯୁକ୍ତି ଦିଆଯାଇଛି।
ସିଦ୍ଧାର୍ଥ ଦାସ ପୂର୍ବରୁ ଅର୍ଥ ବିଭାଗର ଅତିରିକ୍ତ ସଚିବ ଭାବେ କୋଷାଗାର ଓ ଯାଞ୍ଚ ନିର୍ଦ୍ଦେଶାଳୟରେ ଅତିରିକ୍ତ ନିର୍ଦ୍ଦେଶକ ଭାବେ ଅତିରିକ୍ତ ଦାୟିତ୍ୱରେ କାର୍ଯ୍ୟ କରୁଥିଲେ। ଏହି ସମୟରେ ଦୀପଙ୍କର ମହାପାତ୍ର ଓଡ଼ିଶାରେ କୋଷାଗାର ଓ ଯାଞ୍ଚ ନିର୍ଦ୍ଦେଶାଳୟରେ ଅତିରିକ୍ତ ନିର୍ଦ୍ଦେଶକ ଭାବେ କାର୍ଯ୍ୟ କରୁଥିଲେ।
ବଦଳି ବିଜ୍ଞପ୍ତିରେ କୁହାଯାଇଛି ଯେ ଓଏସ୍ଆଇସିର ପରିଚାଳନା ନିର୍ଦ୍ଦେଶକ ଭାବେ ଆଇଏଏସ୍ ଅଧିକାରୀ ମହମ୍ମଦ ସାଦିକ୍ ଆଲାମଙ୍କ ନିଯୁକ୍ତି ଦୀପଙ୍କର ମହାପାତ୍ର ଦାୟିତ୍ୱ ଗ୍ରହଣ କରିବା ପରେ ରଦ୍ଦ ହୋଇଯିବ।
