ସିଦ୍ଧ ଜଗନ୍ନାଥଙ୍କର ପବିତ୍ର ବ୍ୟଞ୍ଜନ ଦ୍ଵାଦଞ୍ଚି ପାଳିତ, ଲାଗି ହେଲା ୭୫ ପ୍ରକାରର ଭୋଗ
କେନ୍ଦୁଝର: କେନ୍ଦୁଝର ପୁରୁଣା ସହରର ସିଦ୍ଧ ମଠ ସ୍ଥିତ ଏକକ ସିଦ୍ଧ ଜଗନ୍ନାଥଙ୍କର ପବିତ୍ର ବ୍ୟଞ୍ଜନ ଦ୍ଵାଦଞ୍ଚି ଆଜି ଭକ୍ତିପୂତ ପରିବେଶରେ ଓ ମହାଆଡମ୍ବର ସହ ପାଳିତ ହୋଇଯାଇଛି । ସିଦ୍ଧ ଜଗନ୍ନାଥଙ୍କ ନିକଟରେ ଆଜି ୭୫ କିସମର ଶଂଖୁଡି ଓ ଶୁଖିଲା ବ୍ୟଞ୍ଜନ ପ୍ରସ୍ତୁତ କରାଯାଇ ଲାଗି ହୋଇଛି । ଏହି ବ୍ୟଞ୍ଜନ ମଧ୍ୟରେ କେନ୍ଦୁଝର ପ୍ରସିଦ୍ଧ ଖେଚୁଡ଼ି, ଦଳା ଖେଚୁଡି, ମାଳେଇ ଖେଚୁଡ଼ି, କପୁରକେଳି, ମୋଡା ବଡି ସହ ଆରିସା, କାକରା, ବାଟ, କନ୍ଧ କ୍ଷିରୀ, ଝିଲି, କ୍ଷୀରପୁଳୀ, ବୁନ୍ଦି ଲଡ଼ୁ, ଖସା ଲଡ଼ୁ, ନଡିଆ କୋରା, କାନିକୀ, କ୍ଷିରୀ, ପିଠା ଓ ମିଠା ଆଦି ବ୍ୟଞ୍ଜନ ପ୍ରସ୍ତୁତ କରାଯାଇଥିଲା ।
ଏହି ବ୍ୟଞ୍ଜନ ସବୁ ସିଦ୍ଧ ଜଗନ୍ନାଥଙ୍କ ନିକଟରେ ଭୋଗ ହେବା ପରେ ଶହ ଶହ ଭକ୍ତ ଏହି ପ୍ରସାଦ ସେବନ କରିଥିଲେ । ଏଠାରେ ଏକକ ଜଗନ୍ନାଥ ପୂଜା ପାଉଥିବା ବେଳେ କେନ୍ଦୁଝରର ଆରାଧ୍ୟ ଦେବତା ଶ୍ରୀ ଶ୍ରୀ ବଳ ଦେବଜିଉଙ୍କ ପ୍ରତିଷ୍ଠାର ବହୁ ପୂର୍ବରୁ ଏହି ସିଦ୍ଧ ଜଗନ୍ନାଥ ଏଠାରେ ପୂଜା ପାଇ ଆସୁଛନ୍ତି । ଆଉ ଏହି ସିଦ୍ଧ ମଠରୁ ଅନେକ ସିଦ୍ଧ ପୁରୁଷ ସିଦ୍ଧି ଲାଭ କରିଥିବାରୁ ଏହି ସ୍ଥାନ ଅନେକ ମହତ ବହନ କରୁଛି ।
