ଆସନ୍ତା ୨୪ ଘଣ୍ଟା ସହ ବର୍ଷା ଉପରେ ବନ୍ୟା ସ୍ଥିତି ନିର୍ଭର କରେ
ଡରାଇଲାଣି ବନ୍ୟା। ଉତ୍ତର ଓଡିଶାରେ ବଡ ବନ୍ୟା ଆଶଙ୍କା କରାଯାଉଛି। ଆସନ୍ତା ୨୪ ଘଣ୍ଟା ସହ ବର୍ଷା ଉପରେ ବନ୍ୟା ସ୍ଥିତି ନିର୍ଭର କରେ ବୋଲି ସୋମବାର ଜଳ ସମ୍ପଦ ସର୍ବୋଚ୍ଚ ଯନ୍ତ୍ରୀ ଚନ୍ଦ୍ରଶେଖର ପାଢୀ କହିଛନ୍ତି।
ମିଳିଥିବା ସୂଚନା ଅନୁସାରେ ସର୍ବୋଚ୍ଚ ଯନ୍ତ୍ରୀ କହିଛନ୍ତି, ଉତ୍ତର ଓଡିଶା ଓ ଝାଡଖଣ୍ଡରେ କିଛି ଦିନରେ ପ୍ରବଳ ବର୍ଷା ହୋଇଛି । ଫଳରେ ସୁବର୍ଣ୍ଣରେଖା, ବୁଢାବଳଙ୍ଗ ଓ ଜଳକାରେ ଜଳସ୍ତର ବଢିବାରେ ଲାଗିଛି । ବନ୍ୟା ସ୍ଥିତି ମଧ୍ୟ ରହିଛି । ପାଣିପାଗ ବିଭାଗ ପକ୍ଷରୁ ମୟୁରଭଞ୍ଜ, ଝାଡଖଣ୍ଡକୁ ୨ ଦିନ ପାଇଁ ରେଡ୍ ଆଲର୍ଟ ଜାରି କରାଯାଇଛି ।
ବର୍ଷାର ପରିମାଣ ବଢିଲେ ଉତ୍ତର ଓଡିଶାର ନଦୀରେ ଜଳସ୍ତର ବୃଦ୍ଧି ପାଇବ। ବର୍ଷାର ପରିମାଣ କମିଲେ ବନ୍ୟା ଆଶଙ୍କା କମ୍ ବୋଲି କୁହାଯାଇଛି । ସମସ୍ତ ସ୍ଥାନରେ ଅଧିକାରୀଙ୍କୁ ପରିଦର୍ଶନ କରି ସ୍ଥିତି ଉପରେ ନଜର ସହ ସଜାଗ ରହିବାକୁ ନିର୍ଦ୍ଦେଶ ଦିଆଯାଇଛି।ଉପର ମୁଣ୍ଡରେ ପ୍ରବଳ ବର୍ଷା ପାଇଁ ଫୁଲିବାରେ ଲାଗିଛି ସୁବର୍ଣ୍ଣରେଖା ନଦୀ । ଲଗାଣ ବର୍ଷା ଯୋଗୁଁ ରାଜଘାଟରେ ବିପଦ ସଙ୍କେତ ଡେଇଁଲା ନଦୀର ଜଳସ୍ତର । ଫଳରେ ୩ଟି ବ୍ଲକର ୧୯ଟି ପଞ୍ଚାୟତ ପ୍ରଭାବିତ ହେବା ଆଶଙ୍କା ରହିଛି । ପ୍ରଭାବିତ ହେବାକୁ ଥିବା ଗାଁରେ ଲୋକଙ୍କୁ ସ୍ଥାନାନ୍ତର କରାଯାଇଛି । ନଦୀ ଉପର ମୁଣ୍ଡରେ ଥିବା ରାସଗୋବିନ୍ଦପୁର, ସୁଳିଆ, ଚିତ୍ରଡା ପ୍ରବୃତି ଅଞ୍ଚଳରେ ଜଳବନ୍ଦୀ ପରିସ୍ଥିତି ସୃଷ୍ଟି ହୋଇଛି ।
