ବର୍ମିଂହାମ୍ ରାଜ୍ୟଗୋଷ୍ଠୀ କ୍ରୀଡ଼ା: ପଦକ ଆଶାରେ ଦୂତି, ଶ୍ରାବଣୀ, ଦୀପ୍ ଗ୍ରେସ, ଅମିତ, ଦିନେଶ
ବର୍ମିଂହାମ (ଇଂଲଣ୍ଡ) : ରାଜ୍ୟଗୋଷ୍ଠୀ କ୍ରୀଡ଼ାର ୨୨ତମ ସଂସ୍କରଣ ବର୍ମିଂହାମଠାରେ ଆଜିଠାରୁ ଆରମ୍ଭ ହେଉଛି । ଅଗଷ୍ଟ ୮ ପର୍ଯ୍ୟନ୍ତ ୧୨ ଦିନ ଧରି ଅନୁଷ୍ଠିତ ହେଉଥିବା ଏହି ରାଜ୍ୟଗୋଷ୍ଠୀ କ୍ରାଡ଼ା ମହାକୁମ୍ଭରେ ୭୨ଟି ଦେଶର ୫,୦୫୪ ଜଣ ଆଥ୍ଲେଟ୍ ଅଂଶଗ୍ରହଣ କରିବେ। ପ୍ରତିଯୋଗିତା ୨୦ଟି କ୍ରୀଡ଼ା ଶୃଙ୍ଖଳାରେ ମୋଟ ୨୮୦ଟି ବର୍ଗରେ ଅନୁଷ୍ଠିତ ହେବ। ୧୯୩୪ ଓ ୨୦୦୨ ପରେ ଇଂଲଣ୍ଡ ୩ୟ ଥର ପାଇଁ ରାଜ୍ୟଗୋଷ୍ଠୀ କ୍ରୀଡ଼ା ଆୟୋଜନ କରିବାକୁ ଯାଉଛି। ବର୍ମିଂହାମର ଆଲେଜାଣ୍ଡାର ଷ୍ଟାଡିୟମରେ ଉଦ୍ଘାଟନୀ ଉତ୍ସବ ଅନୁଷ୍ଠିତ ହେବ। ଚଳିତ ବର୍ମିଂହାମ ରାଜ୍ୟଗୋଷ୍ଠୀ କ୍ରୀଡ଼ାରେ ୫ଟି କ୍ରୀଡ଼ା ମହିଳା କ୍ରିକେଟ, ଜୁଡୋ, ୩/୩ ବାସ୍କେଟବଲ, ପାରା ଟେବୁଲ ଟେନିସ, ୩/୩ ହ୍ବିଲଚେୟାର ବାସ୍କେଟବଲକୁ ସାମିଲ କରାଯାଇଛି। ତେବେ ସୁଟିଂ ଓ ତୀରନ୍ଦାଜୀ କ୍ରୀଡ଼ାକୁ ବାଦ୍ ଦିଆଯାଇଛି।
୧୯୩୦ରୁ କାନାଡାର ହାମିଲଟନରେ ଆରମ୍ଭ ହୋଇଥିବା ଏହି ରାଜ୍ୟଗୋଷ୍ଠୀ କ୍ରୀଡ଼ା ପ୍ରତିଯୋଗିତାରେ ପାରମ୍ପରିକ ଭାବେ ଅଷ୍ଟ୍ରେଲିଆର ସବୁବେଳେ ପ୍ରାଧାନ୍ୟ ଦେଖିବାକୁ ମିିଳିଆସିଛି। ଏହାକୁ ଛାଡ଼ି ଇଂଲଣ୍ଡ, କାନାଡ଼ା ଓ ଭାରତ ମଧ୍ୟ ଅନ୍ୟତମ ଶକ୍ତିଶାଳୀ କ୍ରୀଡ଼ା ଦେଶ ଭାବେ ଉଭା ହୋଇଛନ୍ତି।
