ଚୀନରେ ବଢି ଚାଲିଛି କୋଭିଡ ମୃତ୍ୟୁ ସଂଖ୍ୟା: ଶ୍ମଶାନରେ ଲମ୍ବା ଲାଇନ୍
ବେଜିଂ: ପୁଣି ଚୀନରେ ହାହାକାର ପରିସ୍ଥିତି । କାୟା ବିସ୍ତାର କରିଚାଲିଛି କରୋନା । ବଢିଚାଲିଛି ମୃତ୍ୟୁ ସଂଖ୍ୟା । ନିୟନ୍ତ୍ରଣକୁ ଆସିପାରୁନି । ଭୟରେ ଲୋକ ଘରୁ ବାହାରୁ ନାହାନ୍ତି । ରାସ୍ତାଘାଟ ଶୂନ୍ଶାନ ହୋଇପଡିଛି । ଦେଶରେ କୋଭିଡ ସ୍ଥିତିକୁ ଦୃଷ୍ଟିରେ ରଖି କଟକଣା ଜାରି କରାଯାଇଥିଲା । ହେଲେ ଲୋକଙ୍କ ପ୍ରତିବାଦ ପରେ ଏହାକୁ ହଟାଇ ଦିଆଯାଇଥିଲା । କଟକଣା ହଟିବା ପରେ କାୟା ବିସ୍ତାର କରିଛି କରୋନା। ଚୀନ୍ର ଅନେକ ସହରରେ ଦେଖିବାକୁ ମିଳିଛି ଏଭଳି ସ୍ଥିତି । ଏପରି ସ୍ଥିତିରେ ଶୀତଦିନରେ କୋଭିଡ ସଂକ୍ରମଣ ଶୀର୍ଷରେ ପହଞ୍ଚିବ ଏବଂ ତିନୋଟି ଲହର ଦେଖାଦେବ ବୋଲି ଚେତାବନୀ ଦେଇଛନ୍ତି ଚୀନର ଜଣେ ସ୍ୱାସ୍ଥ୍ୟ ଅଧିକାରୀ ।
BBC ରିପୋର୍ଟ ଅନୁଯାୟୀ, ରବିବାର ଚୀନରେ ୨,୦୯୭ ନୂଆ ମାମଲା ସାମ୍ନାକୁ ଆସିଥିଲା । ଜାନୁଆରୀ ଅଧାଯାଏ ଏପରି ସ୍ଥିତି ଲାଗି ରହିବ ବୋଲି ଆକଳନ କରାଯାଇଛି । କିନ୍ତୁ ୨ୟ ଲହରୀ ଜାନୁଆରୀ ଶେଷ ବେଳକୁ ଯିବାର ସମ୍ଭାବନା ରହିଛି । ରିପୋର୍ଟ ଅନୁଯାୟୀ, ପ୍ରଥମ ଲହର ଖ୍ରୀଷ୍ଟମାସ ପରେ ଆସିବ । ଦ୍ୱିତୀୟ ଲହର ନୂଆ ବର୍ଷ ଓ ତୃତୀୟଟି ଲୁନାର୍ ନ୍ୟୁ ଇୟର ପରେ ଆସିବ।
ଚୀନରେ ଓମିକ୍ରନ ଭାରିଏଣ୍ଟ ଦ୍ରୁତ ଗତିରେ ମାଡିଚାଲିଛି । ହସ୍ପିଟାଲଗୁଡିକରେ ମାଳ ମାଳ ସଂକ୍ରମିତ । ମୃତ୍ୟୁ ସଂଖ୍ୟା ମଧ୍ୟ ବଢ଼ିଛି। ଫଳରେ ଶ୍ମଶାନରେ ଲୋକଙ୍କର ଲମ୍ବା ଲାଇନ୍ ଦେଖିବାକୁ ମିଳିଛି। ବେଜିଂର ସବୁଠୁ ବଡ ଶ୍ମଶାନ ବାବୋଶାନ୍ରେ ସ୍ଥିତି ହିଁ କହୁଛି କୋଭିଡ ସ୍ଥିତି କେମିତି ଅଛି । ଏଠାରେ ଦିନ ରାତି ଜଳୁଛି ନିଆଁ। ଏପରକି ଏଠାରେ ପାର୍କିଂ ପାଇଁ ବି ସ୍ଥାନ ନାହିଁ । ଆଗୁଆ ବୁକିଂନ କଲେ ଜାଗା ମିଳୂୁନି । ଆଉ ବୁକିଂ କରିବା ବି ମୁସକିଲ ହୋଇପଡିଛି ବୋଲି ଏଠିକାର ଜଣେ କର୍ମଚାରୀ କହିଛନ୍ତି । ଯାହା ବି ହେଉ ସଂକ୍ରମଣରେ ତୁରନ୍ତ ରୋକ ନ ଲାଗିଲେ ଆଗକୁ ଏହା ବିସ୍ଫୋରକ ରୂପ ନେବ ବୋଲି ସ୍ୱାସ୍ଥ୍ୟ ଅଧିକାରୀ ଚେତାବନୀ ଦେଇଛନ୍ତି । ଅନ୍ୟପକ୍ଷେ ଚୀନ ସରକାର ଦାବି କରୁଛନ୍ତି , ୯୦ ପ୍ରତିଶତରୁ ଅଧିକ ଲୋକ ଦେଶରେ ଭାକ୍ସିନେଟେଡ ହୋଇଛନ୍ତି ।
