ଯୁଦ୍ଧବିରତି ସତ୍ତ୍ୱେ ଇରାନର ରାଜଧାନୀ ତେହେରାନରେ ଦୁଇଟି ବିସ୍ଫୋରଣ
ମଙ୍ଗଳବାର ଦିନ ଇରାନର ରାଜଧାନୀ ତେହେରାନରେ ଦୁଇଟି ବିସ୍ଫୋରଣ ହୋଇଥିବା ଖବର ମିଳିଛି। ନ୍ୟୁଜ୍ ଏଜେନ୍ସି ମିଜାନ ଏବଂ ଶାର୍ଗ ଖବରକାଗଜ ଏହି ସୂଚନା ଦେଇଛି। କିଛି ଘଣ୍ଟା ପୂର୍ବରୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଇସ୍ରାଏଲକୁ ଇରାନ ଉପରେ ବୋମା ମାଡ଼ ନକରିବାକୁ ଅନୁରୋଧ କରିଥିବା ସମୟରେ ଏହି ବିସ୍ଫୋରଣ ଘଟିଛି। ମଙ୍ଗଳବାର ଦିନ ଘୋଷିତ ଯୁଦ୍ଧବିରତି ପରେ ଏହି ଅପିଲ କରାଯାଇଥିଲା। ଇରାନୀ ଖବରକାଗଜ ଏତେମାଦ ଏବଂ ମିହାନ ଅନୁଯାୟୀ ତେହେରାନରୁ ପ୍ରାୟ ୨୦୦ କିଲୋମିଟର ଦୂରରେ କାସ୍ପିଆନ ସାଗର ଉପକୂଳରେ ଅବସ୍ଥିତ ବାବୋଲ ଏବଂ ବାବୋଲସର ସହରରେ ବିସ୍ଫୋରଣର ଶବ୍ଦ ଶୁଣାଯାଇଥିଲା। ଏହି ଅଞ୍ଚଳଗୁଡ଼ିକରେ ବାୟୁ ପ୍ରତିରକ୍ଷା ବ୍ୟବସ୍ଥା ମଧ୍ୟ ସକ୍ରିୟ କରାଯାଇଥିଲା।ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କିଛି ସମୟ ପୂର୍ବରୁ କହିଥିଲେ ଯେ ଇସ୍ରାଏଲ ଏବଂ ଇରାନ ଉଭୟ ଯୁଦ୍ଧବିରତିର ସର୍ତ୍ତାବଳୀ ଉଲ୍ଲଂଘନ କରିଛନ୍ତି। ଟ୍ରମ୍ପଙ୍କ ଦ୍ୱାରା ପ୍ରସ୍ତାବିତ ଯୁଦ୍ଧବିରତି ମଙ୍ଗଳବାର ସକାଳେ ଆରମ୍ଭ ହୋଇଥିଲା କିନ୍ତୁ କିଛି ଘଣ୍ଟା ପରେ ଇସ୍ରାଏଲ ଇରାନ ଉପରେ କ୍ଷେପଣାସ୍ତ୍ର ଆକ୍ରମଣ କରିଥିବା ଅଭିଯୋଗ କରିଥିଲା। ଇରାନର ସରକାରୀ ଗଣମାଧ୍ୟମ ଏହି ଅଭିଯୋଗଗୁଡ଼ିକୁ ଅସ୍ୱୀକାର କରିଥିଲା ଏବଂ କହିଥିଲା ଯେ ଏହା ଇସ୍ରାଏଲ ଉପରେ ଆକ୍ରମଣ କରିନାହିଁ। ଏହି ସମୟରେ ଟ୍ରମ୍ପ ଉଭୟ ପକ୍ଷ ଉପରେ ଅସନ୍ତୋଷ ପ୍ରକାଶ କରି କହିଥିଲେ ‘ମୁଁ ଇସ୍ରାଏଲ ଉପରେ ମଧ୍ୟ ଖୁସି ନୁହେଁ।’
୧୨ ଦିନ ପୂର୍ବେ ଆରମ୍ଭ ହୋଇଥିବା ଏହି ଯୁଦ୍ଧରେ ଇସ୍ରାଏଲ ଇରାନର ପରମାଣୁ ଏବଂ ବାଲିଷ୍ଟିକ୍ କ୍ଷେପଣାସ୍ତ୍ର କାର୍ଯ୍ୟକ୍ରମକୁ ଟାର୍ଗେଟ କରିଥିଲା। ଇସ୍ରାଏଲୀ ଆକ୍ରମଣରେ ଅତି କମରେ ୧୦ ଜଣ ଇରାନୀ ପରମାଣୁ ବୈଜ୍ଞାନିକଙ୍କ ମୃତ୍ୟୁ ହୋଇଥିଲା। ଏଥିରେ ମହମ୍ମଦ ରେଜା ସେଦିଘି ସାବେର ମଧ୍ୟ ସାମିଲ ଅଛନ୍ତି, ଯାହାଙ୍କ ଉପରେ ଆମେରିକାର ସମ୍ପ୍ରତି ପ୍ରତିବନ୍ଧକ ଲଗାଯାଇଥିଲା। ଅନ୍ୟପକ୍ଷରେ ସୋମବାର ଦିନ ଇରାନ କାତାରରେ ଥିବା ଆମେରିକୀୟ ସାମରିକ ଘାଟି ଉପରେ ସୀମିତ ଆକ୍ରମଣ କରିଥିଲା, ଯାହାକୁ କାତାର ନିନ୍ଦା କରିଥିଲା। ତୁର୍କୀ ଏବଂ ଇଜିପ୍ଟ ଯୁଦ୍ଧବିରତିକୁ ସ୍ୱାଗତ କରିଥିଲେ କିନ୍ତୁ ଉଲ୍ଲଂଘନର ରିପୋର୍ଟ ମଧ୍ୟପ୍ରାଚ୍ୟରେ ଉତ୍ତେଜନାକୁ ବଢ଼ାଇ ଦେଇଛି।ଏହି ସମୟରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ କାର୍ଯ୍ୟାଳୟ କହିଛି ଯେ ପ୍ରଧାନମନ୍ତ୍ରୀ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ କଥା ହେବା ପରେ ଇରାନ ବିରୁଦ୍ଧରେ ଏକ ବଡ଼ ଆକ୍ରମଣକୁ ଏଡାଇ ଦେଇଛନ୍ତି। ନେତାନ୍ୟାହୁଙ୍କ କାର୍ଯ୍ୟାଳୟ କହିଛି ଯେ ମଙ୍ଗଳବାର ଦିନ ଇରାନ କ୍ଷେପଣାସ୍ତ୍ର ଆକ୍ରମଣର ଜବାବରେ ଇସ୍ରାଏଲ ଏକ ଇରାନୀ ରାଡାରକୁ ଟାର୍ଗେଟ କରିଛି। ଏଥିରେ କୁହାଯାଇଛି, ‘ପ୍ରଧାନମନ୍ତ୍ରୀ ନେତାନ୍ୟାହୁଙ୍କ ସହ ରାଷ୍ଟ୍ରପତି ଟ୍ରମ୍ପଙ୍କ ଆଲୋଚନା ପରେ ଇସ୍ରାଏଲ ଅତିରିକ୍ତ ଆକ୍ରମଣ କରିନାହିଁ।’ ଏହ ବୟାନକୁ ଯୁଦ୍ଧବିରତି ପାଳନ କରିବା ଦିଗରେ ଏକ ବଡ଼ ସଙ୍କେତ ଭାବରେ ବିବେଚନା କରାଯାଉଛି।
