ଟ୍ରମ୍ପ ମସ୍କଙ୍କ କମ୍ପାନୀଗୁଡ଼ିକୁ ଦିଆଯାଉଥିବା ସବ୍ସିଡି ବନ୍ଦ କରିବାକୁ ଦେଇଛନ୍ତି ଧମକ
ଏଲନ ମସ୍କ ଟ୍ରମ୍ପଙ୍କ ବିଗ୍ ବିୟୁଟିଫୁଲ୍ ବିଲ୍ ବିପକ୍ଷରେ ଲଗାତର ସ୍ୱର ଉତ୍ତୋଳନ କରୁଛନ୍ତି ଏବଂ ବିଲ୍କୁ ବିରୋଧ କରୁଛନ୍ତି। ଏବେ ଲାଗୁଛି ଟ୍ରମ୍ପଙ୍କ ଧୈର୍ଯ୍ୟର ସୀମା ମଧ୍ୟ ଲଙ୍ଘି ଯାଇଛି ଏବଂ ସେ ବି ମସ୍କଙ୍କୁ ଧମକ ଦେଇଛନ୍ତି। ଟ୍ରମ୍ପ ମସ୍କଙ୍କ କମ୍ପାନୀଗୁଡ଼ିକୁ ଦିଆଯାଉଥିବା ସବ୍ସିଡି ବନ୍ଦ କରିବାକୁ ଧମକ ଦେଇଛନ୍ତି ଏବଂ କହିଛନ୍ତି ଯେ, ମସ୍କ ତାଙ୍କ ଦୋକାନ ବନ୍ଦ କରନ୍ତୁ ଏବଂ ଦକ୍ଷିଣ ଆଫ୍ରିକା ଫେରିଯାଆନ୍ତୁ।ଟ୍ରମ୍ପ ଟ୍ରୁଥ୍ ସୋସିଆଲରେ କରିଥିବା ଏକ ପୋଷ୍ଟରେ ଲେଖିଛନ୍ତି ଯେ, ‘ଏଲନ ମସ୍କ ରାଷ୍ଟ୍ରପତି ପଦ ପାଇଁ ମୋତେ ସମର୍ଥନ କରିବା ପୂର୍ବରୁ ଜାଣିଥିଲେ ଯେ ମୁଁ ଇଭି ଜନାଦେଶର ବିରୋଧୀ। ଏହା ମୂଲ୍ୟହୀନ ଏବଂ ମୁଁ ସବୁବେଳେ ମୋ ଅଭିଯାନରେ ଏକଥା କହିଛି। ଇଲେକ୍ଟ୍ରିକ୍ କାରଗୁଡ଼ିକ ଠିକ୍ ଅଛି, କିନ୍ତୁ ସମସ୍ତଙ୍କୁ ଏଥିପାଇଁ ବାଧ୍ୟ କରାଯାଇପାରିବ ନାହିଁ। ଇତିହାସ ଦେଖିଲେ, ଏଲନ୍ ମସ୍କ ଅନ୍ୟମାନଙ୍କ ତୁଳନାରେ ସର୍ବାଧିକ ସବସିଡି ପାଇଛନ୍ତି ଏବଂ ସବସିଡି ବିନା ମସ୍କଙ୍କୁ ହୁଏତ ଦୋକାନ ବନ୍ଦ କରି ଦକ୍ଷିଣ ଆଫ୍ରିକା ଫେରିଯିବାକୁ ପଡ଼ିପାରେ। ଆଉ କୌଣସି ରକେଟ୍ ଲଞ୍ଚ, ସାଟେଲାଇଟ୍ କିମ୍ବା ଇଲେକ୍ଟ୍ରିକ୍ କାର ଉତ୍ପାଦନ ହେବ ନାହିଁ ଏବଂ ଆମ ଦେଶ ବହୁତ ଟଙ୍କା ସଞ୍ଚୟ କରିବ। ସରକାରୀ ଦକ୍ଷତା ବିଭାଗ ଏ ବିଷୟରେ ଗଭୀର ଭାବରେ ଚିନ୍ତା କରିବା ଉଚିତ। ବହୁତ ଟଙ୍କା ସଞ୍ଚୟ ହେବା ଉଚିତ।
ଟ୍ରମ୍ପଙ୍କ ଏହି ପୋଷ୍ଟ ଏପରି ସମୟରେ ଆସିଛି, ଯେତେବେଳେ ଏଲନ ମସ୍କ ମଧ୍ୟ ସାମାଜିକ ଗଣମାଧ୍ୟମରେ ଏକ ପୋଷ୍ଟରେ ଟ୍ରମ୍ପଙ୍କ ବିଗ୍ ବିୟୁଟିଫୁଲ୍ ବିଲ୍କୁ ତୀବ୍ର ସମାଲୋଚନା କରିଛନ୍ତି ଏବଂ ଧମକ ଦେଇଛନ୍ତି ଯେ, ଯେଉଁ ସଂସଦ ସଦସ୍ୟ ବିଗ୍ ବିୟୁଟିଫୁଲ୍ ବିଲ୍କୁ ସମର୍ଥନ କରିବେ ତାଙ୍କୁ ଆସନ୍ତା ବର୍ଷ ପ୍ରାଥମିକ ନିର୍ବାଚନରେ ପରାଜୟର ସମ୍ମୁଖୀନ ହେବାକୁ ପଡ଼ିପାରେ।
