ପାକିସ୍ତାନର ପୂର୍ବତନ ଗୃହମନ୍ତ୍ରୀ ଶେଖ ରଶିଦ ଗିରଫ
ଇସଲାମାବାଦ,୨।୨ : ଇସଲାମାବାଦ ପୋଲିସ ଦ୍ୱାରା ପାକିସ୍ତାନର ପୂର୍ବତନ ଗୃହମନ୍ତ୍ରୀ ଶେଖ ରଶିଦଙ୍କୁ ଗିରଫ କରାଯାଇଛି। ଗୁରବାର ମୁରି ମୋଟରୱେରୁ ତାଙ୍କୁ ଗିରଫ କରାଯାଇଛି। ଶେଖ ରଶିଦଙ୍କ ସହ ତାଙ୍କ ପୁତୁରା ଶେଖ ରଶିଦ ରଫିକଙ୍କୁ ମଧ୍ୟ ଗିରଫ କରାଯାଇଛି। ରାୱଲପିଣ୍ଡିସ୍ଥିତ ତାଙ୍କ ଘରୁ ତାଙ୍କୁ ଗିରଫ କରାଯାଇଥିବା ଶେଖ ରଶିଦ ଦାବି କରିଛନ୍ତି।
ଶେଖ ରସିଦ ଆୱାମୀ ମୁସଲିମ ଲିଗର ମୁଖ୍ୟ ତଥା ପାକିସ୍ତାନ ତେହେରିକ-ଇ-ଇନସାଫ ଦଳର ମୁଖ୍ୟ ଏବଂ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ନିକଟତର। ଇମ୍ରାନ ଖାନଙ୍କ ସରକାରରେ ସେ ଗୃହମନ୍ତ୍ରୀ ଭାବରେ ଦାୟିତ୍ୱ ଗ୍ରହଣ କରିଥିଲେ। ସୂଚନାଯୋଗ୍ୟ, ନିକଟରେ ପୋଲିସ ମଧ୍ୟ ପିଟିଆଇ ନେତା ତଥା ଇମ୍ରାନ ଖାନଙ୍କ ଘନିଷ୍ଠ ସହଯୋଗୀ ଫୱାଦ ଚୌଧୁରୀଙ୍କୁ ଗିରଫ କରିଥିଲା। ରଶିଦଙ୍କ ଗିରଫ ନେଇ ଇମ୍ରାନ୍ ପ୍ରଧାନମନ୍ତ୍ରୀ ଶେହବାଜ ସରିଫ ସରକାରଙ୍କୁ ଧମକ ଦେଇଛନ୍ତି।
ପାକିସ୍ତାନ ପିପୁଲ୍ସ ପାର୍ଟି ନେତା ରାଜ ଇନାୟତ ଉର ରେହମାନଙ୍କ ଅଭିଯୋଗ ଆଧାରରେ ରଶିଦଙ୍କୁ ଗିରଫ କରାଯାଇଛି। ଇସଲାମାବାଦର ଅବପାରା ପୋଲିସ ଷ୍ଟେସନରେ ପିପିପି ନେତା ଏକ ଅଭିଯୋଗ ଦାଖଲ କରିଥିଲେ। ଅଭିଯୋଗରେ ସେ କହିଛନ୍ତି ଯେ ରଶିଦ ଅଭିଯୋଗ କରିଥିଲେ ଯେ ପୂର୍ବତନ ରାଷ୍ଟ୍ରପତି ତଥା ପିପିପି ଅଧ୍ୟକ୍ଷ ଆସିଫ ଅଲି ଜରଦାରୀ ଇମ୍ରାନ ଖାନଙ୍କୁ ହତ୍ୟା କରିବା ପାଇଁ ଷଡଯନ୍ତ୍ର କରୁଛନ୍ତି। ରଶିଦ କହିଥିଲେ ଯେ ଆସିଫ ଜରଦାରୀ ଦୁର୍ନୀତିରୁ ବହୁ ଟଙ୍କା ରୋଜଗାର କରିଛନ୍ତି ଏବଂ ଏହି ଟଙ୍କା ଆତଙ୍କବାଦୀ ସଂଗଠନରେ ବିନିଯୋଗ କରିଛନ୍ତି। ଆତଙ୍କବାଦୀ ସଂଗଠନକୁ ଟଙ୍କା ଦେଇ ଇମ୍ରାନ ଖାନଙ୍କୁ ହତ୍ୟା କରିବା ପାଇଁ ଜରଦାରୀ ଷଡଯନ୍ତ୍ର କରିଛନ୍ତି। ଶେଖ ରସିଦଙ୍କ ଏହି ବିବୃତ୍ତିକୁ ପିପିପି ଦୃଢ଼ ବିରୋଧ କରିଥିଲା।
ଗିରଫ ହେବା ପରେ ରଶିଦଙ୍କୁ ସଚିବାଳୟ ପୋଲିସ ଷ୍ଟେଶନରେ ରଖାଯାଇଛି। ଗିରଫ ପରେ ସେ କହିଛନ୍ତି ଯେ ତାଙ୍କର ଦୋଷ ହେଉଛି ଯେ ମୁଁ ଇମ୍ରାନ ଖାନଙ୍କ ସହ ଛିଡା ହୋଇଛି। ବର୍ତ୍ତମାନର ସରକାରଙ୍କ ଗୃହମନ୍ତ୍ରୀ ରାଣା ସନାଉଲ୍ଲାଙ୍କ ନିର୍ଦ୍ଦେଶରେ ତାଙ୍କୁ ଗିରଫ କରାଯାଇଛି ବୋଲି ସେ ଅଭିଯୋଗ କରିଛନ୍ତି।
