ଭୂକମ୍ପରେ ମୃତ୍ୟୁ ସଂଖ୍ୟା ଟପିଲା ୨୫ ହଜାର, ଉଦ୍ଧାର କାର୍ଯ୍ୟରେ ବାଧକ ସାଜିଛି କୋହଲା ପାଗ
ନୂଆଦିଲ୍ଲୀ: ତୁର୍କୀ ଏବଂ ସରିଆରେ ମାନବୀୟ ସଙ୍କଟ। ଭୂକମ୍ପରେ ମୃତ୍ୟୁ ସଂଖ୍ୟା ଟପିଲା ୨୫ ହଜାର। ଫେବୃଆରୀ ୬ରେ ତୁର୍କୀ ଏବଂ ସିରିଆର ପଶ୍ଚିମ ଏସୀୟ ଦେଶରେ ଘଟିଥିବା ଏହି ଭୂକମ୍ପରେ ବ୍ୟାପକ ଧ୍ୱଂସ ଘଟିଛି। ଏହି ଦୁଇ ଦେଶରେ ଏପର୍ଯ୍ୟନ୍ତ ୨୫ ହଜାରରୁ ଅଧିକ ଲୋକ ପ୍ରାଣ ହରାଇଛନ୍ତି। ତୁଷାରପାତ ଏବଂ ବର୍ଷା ମଧ୍ୟରେ ଆବର୍ଜନା ତଳେ ପୋତି ହୋଇଥିବା ଲୋକଙ୍କୁ ଉଦ୍ଧାର କାର୍ଯ୍ୟ ଜାରି ରହିଛି। ଆଗକୁ ମୃତ୍ୟୁ ସଂଖ୍ୟା ଆହୁରି ବଢ଼ିପାରେ ବୋଲି ତୁର୍କୀ ସରକାର କହିଛନ୍ତି।
ମାର୍ଚ୍ଚ ୨୦୧୧ରେ ଜାପାନର ଫୁକୁସିମାଠାରେ ଘଟିଥିବା ଦୁର୍ଘଟଣାରେ ମୃତ୍ୟୁବରଣ କରିଥିବା ଲୋକଙ୍କ ସଂଖ୍ୟାଠାରୁ ଏହି ସଂଖ୍ୟା ଅଧିକ। ଏଥି ସହିତ ତୁର୍କୀ ଏବଂ ସିରିଆର ବିପର୍ଯ୍ୟୟ ପରେ ବଞ୍ଚିଥିବା ଲୋକଙ୍କ ସାମ୍ନାରେ ଖାଦ୍ୟ ଓ ପାନୀୟ ସଙ୍କଟ ଦେଖାଦେଇଛି। ଏହି ସମୟରେ ତୁର୍କୀରେ ବହୁତ ଥଣ୍ଡା ପାଗ ରହିଛି।
ତୁର୍କୀରେ, ଅନେକ ସହରରେ ତାପମାତ୍ରା ଶୂନରୁ କମ୍, ଏହା ବ୍ୟତୀତ ବାରମ୍ବାର ବର୍ଷା ହେଉଛି। ଯେଉଁମାନେ ବଞ୍ଚିଛନ୍ତି ଏବଂ ସେମାନଙ୍କର ଘର ନାହିଁ। ସେମାନଙ୍କୁ ଖାଦ୍ୟ ଏବଂ ପାନୀୟ ସହିତ ତୁରନ୍ତ ଆଶ୍ରୟ ଦେବା ଆବଶ୍ୟକ ହୋଇପଡ଼ିଛି।
ସ୍ଥାନୀୟ ଲୋକ କହିଛନ୍ତି ଯେ ଜରୁରୀକାଳୀନ ସେବା ବହୁତ ଧୀମା ରହିଛି। ଅନେକଙ୍କ ନିକଟରେ ସେବା ପହଞ୍ଚିପାରୁ ନାହିଁ। ଭୂକମ୍ପ ପରେ କିଛି ଲୋକ ସାହାଯ୍ୟକୁ ଅପେକ୍ଷା କରି ଶେଷ ନିଃଶ୍ୱାସ ନେଉଥିବା ସୂଚନା ରହିଛି। ଏକ ରିପୋର୍ଟରେ କୁହାଯାଇଛି ଯେ ସିରିଆରେ ହୋଇଥିବା ଭୂକମ୍ପରେ ପ୍ରାଣ ହରାଇଥିବା ଲୋକଙ୍କୁ ଏକାଠି ସମାଧି ଦିଆଯାଉଛି।
