ରକ୍ତ ପରୀକ୍ଷାରୁ ଜାଣି ହେବ କାହାକୁ ଅଧିକ ସମୟ ସଂକ୍ରମଣ କରିବ କୋଭିଡ
ନୂଆଦିଲ୍ଲୀ: ମହାମାରୀ କୋରୋନା ସମଗ୍ର ବିଶ୍ବର ସ୍ବାସ୍ଥ୍ୟ କ୍ଷେତ୍ରରେ ପ୍ରଭାବ ପକାଇଥିବା ସମୟରେ ଆସିଛି ଖୁସି ଖବର । ଅନୁସନ୍ଧାନକାରୀମାନେ ଏପରି ଏକ ଚିକିତ୍ସା ପ୍ରଣାଳୀ ପ୍ରସ୍ତୁତ କରିଛନ୍ତି, ଯେଉଁଥିରେ କୋଭିଡ ଦୀର୍ଘ ସମୟ ଧରି ଆକ୍ରାନ୍ତ କରିବ କି ନାହିଁ ସେ ବାବଦରେ ପ୍ରାଥମିକ ପର୍ଯ୍ୟାୟରୁ ଜଣାପଡିଯିବ । ଏଥିପାଇଁ ଏକ ସରଳ ରକ୍ତ ପରୀକ୍ଷା କରାଯିବ । ଅନୁସନ୍ଧାନକାରୀମାନେ ରିପୋର୍ଟ କରିଛନ୍ତି ଯେ, କୋଭିଡ-19 ସଂକ୍ରମଣ ସମୟରେ ନିଆଯାଇଥିବା ରକ୍ତ ପରୀକ୍ଷା ପୂର୍ବାନୁମାନ କରିପାରେ ଯେ, ସଂକ୍ରମଣ ଦୀର୍ଘ ସମୟ ରହିବ କି ନାହିଁ ।
ବ୍ରିଟେନର ୟୁନିଭରସିଟି କଲେଜ ଲଣ୍ଡନର ଏକ ଟିମ୍ ଦ୍ୱାରା କରାଯାଇଥିବା ଅଧ୍ୟୟନରେ ଲାନସେଟ୍ ଇ-ବାୟୋମେଡିସିନରେ ପ୍ରକାଶିତ ତଥ୍ୟ ଅନୁଯାୟୀ, SARS-CoV-2 ଦ୍ବାରା ସଂକ୍ରମିତ ସ୍ୱାସ୍ଥ୍ୟସେବା କର୍ମଚାରୀଙ୍କ ରକ୍ତରେ ଥିବା ପ୍ରୋଟିନ୍ ଉପରେ ପରୀକ୍ଷଣ କରାଯାଇ ସଂକ୍ରମିତ ହୋଇନଥିବା ସ୍ୱାସ୍ଥ୍ୟ କର୍ମଚାରୀଙ୍କ ନମୁନା ସହିତ ତୁଳନା କରାଯାଇଥିଲା ।
ସାଧାରଣତ ଶରୀରରେ ପ୍ରୋଟିନ୍ ସ୍ତର ସ୍ଥିର ଥାଏ, କିନ୍ତୁ ସଂକ୍ରମଣର ଛଅ ସପ୍ତାହ ପର୍ଯ୍ୟନ୍ତ ସେମାନେ କେତେକ ପ୍ରୋଟିନ୍ ସ୍ତରରେ ଏକ ଭିନ୍ନ ପାର୍ଥକ୍ୟ ପାଇଥିଲେ, ଯାହାକି ଅନେକ ଗୁରୁତ୍ୱପୂର୍ଣ୍ଣ ଜୈବ ପ୍ରକ୍ରିୟାରେ ବ୍ୟାଘାତ ସୃଷ୍ଟି କରିଥାଏ । ଅନୁସନ୍ଧାନକାରୀମାନେ ଏକ କୃତ୍ରିମ ବୁଦ୍ଧିମତା (Artificial Intelligence, AI) ଆଲଗୋରିଦମ ବ୍ୟବହାର କରି ବିଭିନ୍ନ ପ୍ରୋଟିନର ପ୍ରଚୁର ପରିମାଣରେ ଏକ “signature” ଚିହ୍ନଟ କଲେ, ଯେଉଁଥିରେ ଜଣେ ବ୍ୟକ୍ତି ଠାରେ ସଂକ୍ରମଣର ଗୋଟିଏ ବର୍ଷ ପରେ ମଧ୍ୟ ଲକ୍ଷଣ ରହିବ କି ନାହିଁ ତାହା ପୂର୍ବାନୁମାନ କରିପାରିବ । ସେହିପରି ପଲିମେରେଜ୍ ଚେନ୍ ପ୍ରତିକ୍ରିୟା ପରୀକ୍ଷା ମାଧ୍ୟମରେ କୋଭିଡ ଦୀର୍ଘ ସମୟ ଧରି ସଂକ୍ରମିତ କରିବ କି ନାହିଁ ସେ ବାବଦରେ ଜଣାପଡିବ ।
ଅନୁସନ୍ଧାନର ମୁଖ୍ୟ ଲେଖକ କହିଛନ୍ତି ଯେ, “ଅଧ୍ୟୟନରୁ ଜଣାପଡିଛି ଯେ, କୋଭିଡରେ ସାମାନ୍ୟ କିମ୍ବା ଲକ୍ଷଣ ବିହୀନ ସଂକ୍ରମିତଙ୍କ ପ୍ଲାଜାମାରେ ପ୍ରୋଟିନର ପ୍ରୋଫାଇଲକୁ ବ୍ୟାହତ କରିଥାଏ । ଏହାର ଅର୍ଥ ହେଉଛି ସଂକ୍ରମଣର ଅତି କମରେ ଛଅ ସପ୍ତାହ ପର୍ଯ୍ୟନ୍ତ କୋଭିଡ-19 ମଧ୍ୟ ସାଧାରଣ ଜୈବ ପ୍ରକ୍ରିୟାକୁ ଭିନ୍ନ ପ୍ରକାରରେ ପ୍ରଭାବିତ କରିଥାଏ, ।”
ମିଚିଗାନ୍ ବିଶ୍ୱବିଦ୍ୟାଳୟର ଅନୁସନ୍ଧାନକାରୀଙ୍କ ନିକଟରେ ହୋଇଥିବା ଏକ ଅଧ୍ୟୟନ ଅନୁଯାୟୀ, 100 ମିଲିୟନରୁ ଅଧିକ କୋଭିଡ ସଂକ୍ରମିତ, ସୁସ୍ଥ ହେବା ପରେ ମଧ୍ୟ ସେମାନଙ୍କ ଠାରେ କୋଭିଡ ସଂକ୍ରମଣ ରହିଥିଲା । ଅନୁସନ୍ଧାନର ବରିଷ୍ଠ ଲେଖକ ଡ. ୱେନ୍ଦେ ହେଉଡ୍ କହିଛନ୍ତି, “ଯଦି ଆମେ ପ୍ରାଥମିକ ପର୍ଯ୍ୟାୟରୁ ଦୀର୍ଘ ସମୟ ଧରି କୋଭିଡ ସଂକ୍ରମଣ ହେବାର ସମ୍ଭାବନା ଥିବା ଲୋକଙ୍କୁ ଚିହ୍ନଟ କରିପାରିବା, ତେବେ ରୋଗୀଙ୍କୁ ସଠିକ୍ ଚିକିତ୍ସା ସହ କୋଭିଡ ବିପଦକୁ ରୋକିପାରିବା ।”
