ନର୍ମଦାଙ୍କୁ ପୂଜା କରି ମଧ୍ୟପ୍ରଦେଶରେ ପ୍ରଚାର କରୁଛନ୍ତି ପ୍ରିୟଙ୍କା
ଭୋପାଳ: ମଧ୍ୟପ୍ରଦେଶ ବିଧାନସଭା ନିର୍ବାଚନ ପାଇଁ କଂଗ୍ରେସର ନିର୍ବାଚନ ପ୍ରସ୍ତୁତି । କର୍ଣ୍ଣାଟକ ବିଜୟ ପରେ ମଧ୍ୟପ୍ରଦେଶରେ ମହାବିଜୟ ଲକ୍ଷ୍ୟରେ କ୍ୟାମ୍ପେନ ଆରମ୍ଭ କରିଛି କଂଗ୍ରେସ । ଆଦିବାସୀ ବହୁଳ ଜବଲପୁର ଗୌରୀ ଘାଟରେ ନର୍ମଦା ପୂଜା କରି ପ୍ରଚାର ଅଭିଯାନ ଆରମ୍ଭ କରିଛନ୍ତି କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ । ଏହି ସ୍ମାରକୀଠାରେ ଆୟୋଜିତ ଏକ ଜନସଭାକୁ ସମ୍ବୋଧିତ କରିଛନ୍ତି ପ୍ରିୟଙ୍କା ।
ସଭାରେ ପୂର୍ବତନ ମୁଖ୍ୟମନ୍ତ୍ରୀ କମଲନାଥଙ୍କ ସମେତ କଂଗ୍ରେସର ବହୁ ବରିଷ୍ଠ ନେତା ଉପସ୍ଥିତ ଥିଲେ । ମଧ୍ୟପ୍ରଦେଶର ମହାକୋଶଲ ଅଞ୍ଚଳର ମଧ୍ୟଭାଗରେ ରହିଛି ଜବଲପୁର । ଏହି ଅଞ୍ଚଳରେ ଅଧିକାଂଶ ଆଦିବାସୀ ଲୋକ ବସବାସ କରନ୍ତି । ୨୦୧୮ ନିର୍ବାଚନରେ ଏହି ଅଞ୍ଚଳର ୧୩ଟି ଏସଟି ସଂରକ୍ଷିତ ଆସନରୁ କଂଗ୍ରେସ ୧୧ ଆସନରେ ବିଜୟୀ ହୋଇଥିଲା । ଅବଶିଷ୍ଟ ୨ଟି ଆସନ ବିଜେପି ହାତକୁ ଯାଇଥିଲା ।
ମଧ୍ୟପ୍ରଦେଶରେ ୬ଟି ଅଞ୍ଚଳ ମହାକୋଷଳ, ଗ୍ବାଲିୟର-ଚମ୍ବଲ, କେନ୍ଦ୍ରୀୟ ଭାରତ, ନିମାର-ମାଲଓ୍ବା, ବିନ୍ଧ ଓ ବୁନ୍ଦେଲଖଣ୍ଡ ରହିଥିବାବେଳେ ସବୁ ଅଞ୍ଚଳରେ କଂଗ୍ରେସ ଭଲ କରିବ ବୋଲି ଦଳ ଆଶା ରଖିଛି ।
