ଖୁବଶୀଘ୍ର ବୈଦ୍ୟୁତିକ ଯାନ ଲଞ୍ଚ୍ କରିବ ଆମ୍ବାସାଡ଼ର
ପ୍ରସିଦ୍ଧ ଗାଡ଼ି ଆମ୍ବାସାଡ଼ର ନିର୍ମାତା ହିନ୍ଦୁସ୍ତାନ ମୋଟର୍ସ ଆସନ୍ତା ବର୍ଷ ବୈଦ୍ୟୁତିକ ଯାନ ଲଞ୍ଚ୍ କରିବାକୁ ପ୍ରସ୍ତୁତି କରୁଛି। କମ୍ପାନୀର ଜଣେ ବରିଷ୍ଠ ଅଧିକାରୀ କହିଛନ୍ତି ଯେ, ୟୁରୋପୀୟ ଅଂଶୀଦାର ସହିତ ମିଳିତ ଉଦ୍ୟମରେ ଏକ ବୈଦ୍ୟୁତିକ ଦୁଇ ଚକିଆ ଯାନର ବଜାର ପ୍ରବେଶ ପାଇଁ ପ୍ରସ୍ତୁତି ଚଳାଇଛୁ। ସେ କହିଛନ୍ତି, ଆଗାମୀ ଦିନରେ କମ୍ପାନୀ ବୈଦ୍ୟୁତିକ ଯାନ ମଧ୍ୟ ତିଆରି କରିପାରେ।
ହିନ୍ଦୁସ୍ତାନ ମୋଟର୍ସ ନିର୍ଦ୍ଦେଶକ ଉତ୍ତମ ବୋଷ କହିଛନ୍ତି ଯେ, ଉଭୟ କମ୍ପାନୀର ଆର୍ଥିକ ଅଡିଟ୍ ଜୁଲାଇରୁ ଆରମ୍ଭ ହେବ, ଯାହା ଦୁଇ ମାସ ଲାଗିବ। ଏହାପରେ ମିଳିତ ଉଦ୍ୟୋଗର ବୈଷୟିକ ଦିଗ ଉପରେ ବିଚାର କରାଯିବ। ଏଥିପାଇଁ ଆଉ ମାସେ ଲାଗିବ। ସେ କହିଛନ୍ତି, ତା’ପରେ ହିଁ ପୁଞ୍ଜିନିବେଶ ଉପରେ ନିଷ୍ପତ୍ତି ନିଆଯିବ ଏବଂ ନୂତନ କମ୍ପାନୀ ଗଠନ କରାଯିବ। ଏ ସମସ୍ତ କାମ ଫେବୃଆରୀ ୧୫ ସୁଦ୍ଧା ଶେଷ ହେବ ବୋଲି ଆଶା କରାଯାଉଛି। ଆସନ୍ତା ଆର୍ଥିକ ବର୍ଷ ଶେଷ ସୁଦ୍ଧା ଚୂଡ଼ାନ୍ତ ଉତ୍ପାଦ ଲଞ୍ଚ ହେବାର ସମ୍ଭାବନା ରହିଛି ବୋଲି ବୋଷ କହିଛନ୍ତି।
