ଶାହରୁଖଙ୍କ ଫିଲ୍ମ ‘ଜୱାନ’ରେ ଦୀପିକା ନଜର ଆସିବେ ଗୁରୁତ୍ବପୂର୍ଣ୍ଣ ଭୂମିକାରେ
ଶାହାରୁଖ ଖାନଙ୍କ ବିପକ୍ଷରେ ଫିଲ୍ମ ‘ଓମ ଶାନ୍ତି ଓମ’ରୁ ଇଣ୍ଡଷ୍ଟ୍ରିରେ କ୍ୟାରିୟର ଆରମ୍ଭ କରିଥିବା ବଲିଉଡ ଅଭିନେତ୍ରୀ ଦୀପିକା ପାଦୁକୋନ ଏବେ ଖୁବ୍ ଚର୍ଚ୍ଚାରେ । ଏବେ ପୁଣି ଥରେ ଦୀପିକା ପାଦୁକୋନ ଏବଂ ଶାହାରୁଖ ଖାନ ବଡ଼ ପରଦାରେ ଧମାଲ କରିବାକୁ ପ୍ରସ୍ତୁତ ଅଛନ୍ତି । ଫିଲ୍ମ ‘ପଠାନ’ରେ ଉଭୟଙ୍କୁ ଏକାଠି ଦେଖିବାକୁ ମିଳିବ। ତେବେ ଫିଲ୍ମ ‘ପଠାନ’ ପୂର୍ବରୁ କୁହାଯାଉଛି କି ଦୀପିକାଙ୍କୁ ଶାହରୁଖ ଖାନ ଏବଂ ନୟନତାରାଙ୍କ ସହ ‘ଜୱାନ’ରେ ମଧ୍ୟ ଦେଖିବାକୁ ମିଳିବ ।
‘ପିଙ୍କଭିଲ୍ଲା’ର ରିପୋର୍ଟ ଅନୁଯାୟୀ ଶାହରୁଖ ଖାନ ଏବଂ ଚଳଚ୍ଚିତ୍ର ନିର୍ଦ୍ଦେଶକ ଏଟଲି କୁମାର ଦୀପିକାଙ୍କୁ ଫିଲ୍ମର ଏକ ଅଂଶ ବୋଲି ନିଶ୍ଚିତ କରିଛନ୍ତି। ଦୀପିକା ଏହି ଚଳଚ୍ଚିତ୍ରରେ ଏକ ଛୋଟ କିନ୍ତୁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବାକୁ ରାଜି ହୋଇଛନ୍ତି, କିନ୍ତୁ ସେ ଏପର୍ଯ୍ୟନ୍ତ ଏହାକୁ ଅଫିସିଆଲି ଭାବେ ନିଶ୍ଚିତ କରିନାହାଁନ୍ତି। କୁହାଯାଉଛି ଯେ ଶାହରୁଖ ଏବଂ ଏଟଲି ହାଇଦ୍ରାବାଦରେ ଦୀପିକାଙ୍କୁ ଭେଟିଥିଲେ, ଯେଉଁଠାରେ ସେ ସୁପରଷ୍ଟାର ପ୍ରଭାସଙ୍କ ସହ ଫିଲ୍ମ ‘ପ୍ରୋଜେକ୍ଟ କେ’ର ସୁଟିଂ କରୁଥିଲେ।
ଏହା ମଧ୍ୟ କୁହାଯାଉଛି ଯେ ଦୀପିକା ପାଦୁକୋନଙ୍କୁ ରଣବୀର କପୁର ଏବଂ ଆଲିଆ ଭଟ୍ଟଙ୍କ ଅଭିନୀତ ଚଳଚ୍ଚିତ୍ର ‘ବ୍ରହ୍ମାସ୍ତ୍ର’ରେ କ୍ୟାମୋ ଭୂମିକାରେ ଦେଖିବାକୁ ମିଳିବ। ପ୍ରଶଂସକମାନେ ଫିଲ୍ମର ଟ୍ରେଲରରେ ଦୀପିକାଙ୍କ ଲୁକ ମଧ୍ୟ ଦେଖିଛନ୍ତି। ଦୀପିକା ତାଙ୍କ କ୍ୟାରିୟରର ଶିଖରରେ ଅଛନ୍ତି ଏବଂ ତାଙ୍କ ଫିଲ୍ମ ଲିଷ୍ଟରେ ଅନେକ ବଡ଼ ଚଳଚ୍ଚିତ୍ର ଅଛି ।
