ମଧୂବାଳାଙ୍କ ଜୀବନୀ ଉପରେ ଫିଲ୍ମ କରିବେ ଟୁଟୁ ଶର୍ମା

ମୁମ୍ବାଇ: ମହାନ ଅଭିନେତ୍ରୀ ମଧୂବାଳାଙ୍କ ଜୀବନୀ ଉପରେ ଫିଲ୍ମ କରିବା ପାଇଁ ନିର୍ମାତା ଟୁଟୁ ଶର୍ମା ନିଷ୍ପତି ନେଇଛନ୍ତି । ସୁଶୀଲା କୁମାରୀଙ୍କ ପୁସ୍ତକ ମଧୂବାଳା-ଦର୍ଦ କା ସଫର ଉପରେ ଏହି ଫିଲ୍ମ ଆଧାରିତ ହେବ । ମୁଗଲ ଏ ଆଜାମ ଫିଲ୍ମର ଅନାରକଲୀ ଭୂମିକା କରି ସେ ଘରେ ଘରେ ପରିଚିତ ହୋଇଥିଲେ । ୬୦ରୁ ଊର୍ଦ୍ଧ୍ୱ ଫିଲ୍ମରେ ଅଭିନୟ କରିଥିବା ମଧୂବାଳାଙ୍କ ଶେଷ ଜୀବନ କିନ୍ତୁ ଦୁଃଖରେ କଟିଥିଲା ।

ସର୍ବକାଳୀନ ଶ୍ରେଷ୍ଠ ଅଭିନେତ୍ରୀ ଶ୍ରେଣୀରେ ସାମିଲ ମଧୂବାଳାଙ୍କ ଜୀବନ ବିଷୟରେ କିଏ ବା ଜାଣିବାକୁ ଚାହିଁବନି ବୋଲି ଟୁଟୁ ଶର୍ମା କହିଛନ୍ତି । କେବେ ଏହି ଫିଲ୍ମ ଫ୍ଲୋରକୁ ଯିବ ପ୍ରଶ୍ନର ଉତରରେ ସେ କହିଥିଲେ, ପ୍ରଥମେ କାହାଣୀ ପ୍ରସ୍ତୁତ ହୋଇସାରିବା ପରେ ଏହି ଭୂମିକାରେ କିଏ ଅଭିନୟ କରିବ ତାହା ସ୍ପଷ୍ଟ କରାଯିବ । ମୋତେ ଏକ ସମ୍ମାନଜନକ କାମ ମିଳିଛି ଏବଂ ଏହାକୁ ମୁଁ ହାତଛଡା କରିବାକୁ ଚାହୁଁ ନାହିଁ ବୋଲି ସେ କହିଛନ୍ତି । ସେ ଏପରି ଏକ ଅଭିନେତ୍ରୀ ଥିଲେ ଯେ ତାଙ୍କର ଅଭିନୟ ଶୈଳୀ, ଷ୍ଟାଇଲ, ଲୁକ ସବୁ କିଛି ଏବେ ବି କପି କରାଯାଉଛି ବୋଲି ସେ କହିଛନ୍ତି ।