ଗୁଜୁରାଟ ଦଙ୍ଗା ମାମଲାରେ ସାମାଜିକ କର୍ମୀ ତିସ୍ତା ଶୀତଳବାଡ଼ଙ୍କୁ ଅଟକ
ଅହମ୍ମଦାବାଦ: ୨୦୦୨ ଗୁଜୁରାଟ ଦଙ୍ଗାକୁ ନେଇ ସୁପ୍ରିମକୋର୍ଟଙ୍କ ରାୟର ଗୋଟିଏ ଦିନ ପରେ ଗୁଜୁରାଟ ଏଟିଏସର ଦୁଇଟି ଟିମ୍ ସାମାଜିକ କର୍ମୀ ତିସ୍ତା ଶୀତଳବାଡ଼ଙ୍କୁ ଅଟକ ରଖାଯାଇଛି। ତାଙ୍କୁ ମୁମ୍ବାଇର ସାଣ୍ଟାକ୍ରୁଜ ପୁଲିସ ଷ୍ଟେସନକୁ ନିଆଯାଇଥିଲା। ଏହା ପରେ ଏଟିଏସ୍ ଟିମ୍ ତାଙ୍କ ଏନଜିଓର ଯାଞ୍ଚ ପାଇଁ ଅହମ୍ମଦାବାଦକୁ ନେଇଛନ୍ତି। ଏହାପୂର୍ବରୁ ଦିବଂଗତ କଂଗ୍ରେସ ନେତା ଏଶାନ୍ ଜାଫ୍ରିଙ୍କ ବିଧବା ପତ୍ନୀ ଜାକିଆ ଜାଫ୍ରି ଦାଏର କରିଥିବା ପିଟିସନ୍କୁ ଶୁକ୍ରବାର ଦିନ ସୁପ୍ରିମକୋର୍ଟ ଖାରଜ କରି ଦେଇଥିଲେ ଏବଂ ତିସ୍ତାଙ୍କ ଏନଜିଓର ତଦନ୍ତ ପାଇଁ କହିଥିଲେ । ବିଶ୍ୱାସ କରାଯାଉଛି ଯେ ଏହା ପରେ ଏଟିଏସ୍ ଏହି ପଦକ୍ଷେପ ନେଇଛି। ଗୁଜୁରାଟ ଏଟିଏସ୍ ମୁମ୍ବାଇର ସାଣ୍ଟାକ୍ରୁଜ୍ ପୁଲିସ୍ ଷ୍ଟେସନରେ ତିସ୍ତା ଶୀତଳବାଡ଼ଙ୍କ ବିରୋଧରେ ଏଫ୍ଆଇଆର୍ ଦାଖଲ କରିଛି। ଯେଉଁଥିରେ ଆଇପିସିର ଧାରା ୪୬୮ ଏବଂ ୪୭୧ ଅନୁଯାୟୀ ଜାଲିଆତି ଅଭିଯୋଗ କରାଯାଇଛି। ଏଟିଏସ୍ ଅଧିକାରୀ ଜସ୍ମିନ୍ ରୋଜିୟା କହିଛନ୍ତି ଯେ ତିସ୍ତା ଶୀତଳବାଡ଼ଙ୍କୁ ସାଣ୍ଟାକ୍ରୁଜ୍ ଥାନାକୁ ନିଆଯାଇଛି।
ପ୍ରକ୍ରିୟା ଶେଷ ହେବା ପରେ ତାଙ୍କୁ ଅହମ୍ମଦାବାଦ ନଗର ପୁଲିସ ଷ୍ଟେସନକୁ ନିଆଯିବ। ଏହି ପ୍ରସଙ୍ଗରେ ବିଜେପି ମୁଖପାତ୍ର ସମ୍ବିତ ପାତ୍ର କହିଛନ୍ତି ଯେ ତିସ୍ତା ଆଣ୍ଡ କମ୍ପାନି ଦେଶର ଲୋକଙ୍କୁ ପ୍ରତାରଣା କରିଛନ୍ତି। ଷଡଯନ୍ତ୍ରକାରୀମାନେ ମଧ୍ୟ ଆଇନର ସମ୍ମୁଖୀନ ହେବା ଉଚିତ୍। ସେ କହିଛନ୍ତି ଯେ ତିସ୍ତାଙ୍କ ଭଳି ଲୋକମାନେ ଏକାଠି ଏହି ଭୁଲ କାମ କରିଛନ୍ତି | ଗୁଜୁରାଟ ଦଙ୍ଗା ସମ୍ପର୍କରେ ଲୋକଙ୍କୁ ଉତ୍ତେଜିତ କରିବା ପାଇଁ ତିସ୍ତା ଶୀତଳବାଡ଼ କାର୍ଯ୍ୟ କରିଥିଲେ।
ସୂଚନାଯୋଗ୍ୟ ଯେ ୨୦୦୨ରେ ଗୁଜରାଟରେ ବଡ଼ ଧରଣର ସାଂପ୍ରଦାୟିକ ଦଙ୍ଗା ହୋଇଥିଲା। ଦଙ୍ଗା ସମୟରେ ଅହମଦାବାଦର ଗୁଲ୍ବର୍ଗା ସୋସାଇଟିରେ ଏହସାନ ଜାଫ୍ରିଙ୍କ ସମେତ ୬୯ ଜଣଙ୍କ ମୃତ୍ୟୁ ହୋଇଥିଲା। ୨୦୦୬ରେ ଜାକିଆ ଜାଫ୍ରି ଏନେଇ ମାମଲା ରୁଜୁ କରିଥିଲେ। ଏହା ଏକ ବଡ଼ ଷଡ଼ଯନ୍ତ୍ର ଥିଲା ବୋଲି ସେ ଦାବି କରିଥିଲେ। ୨୦୧୧ରେ ଏହି ମାମଲାର ତଦନ୍ତ ପାଇଁ ଏସ୍ଆଇଟି ଗଠନ ହୋଇଥିଲା। ୨୦୧୨ ଫେବ୍ରୁଆରିରେ ଏସ୍ଆଇଟି ଚୂଡ଼ାନ୍ତ ରିପୋର୍ଟ ଦାଖଲ କରିଥିଲା। କଂଗ୍ରେସ ନେତା ଏହସାନ ଜାଫରିଙ୍କ ପତ୍ନୀ ଜାକିଆ ଜାଫରି ଦଙ୍ଗା ମାମଲାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମିଳିଥିବା କ୍ଲିନଚିଟ୍କୁ ଚ୍ୟାଲେଂଜ କରି ସୁପ୍ରିମକୋର୍ଟରେ ଆବେଦନ କରିଥିଲେ।
