ଚାଉଳ ଦର ନିୟନ୍ତ୍ରଣ ପାଇଁ କେନ୍ଦ୍ରର ବଡ଼ ନିଷ୍ପତ୍ତି, ୨୦ ପ୍ରତିଶତ ରପ୍ତାନୀ ଶୁଳ୍କ ଲାଗୁ
ନୂଆଦିଲ୍ଲୀ: ଭାରତରେ ଚାଉଳ ମୂଲ୍ୟରେ ନିୟନ୍ତ୍ରଣ ଆଣିବା ପାଇଁ କେନ୍ଦ୍ର ସରକାର ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି । ରିପୋର୍ଟ ଅନୁସାରେ, କେନ୍ଦ୍ର ସରକାର ଚାଉଳର ବିଭିନ୍ନ ଗ୍ରେଡର ରପ୍ତାନୀ ଉପରେ ୨୦ ପ୍ରତିଶତ ଶୁଳ୍କ ଲାଗୁ କରିଛନ୍ତି । ଉଲ୍ଲେଖଯୋଗ୍ୟ ଯେ, ପଶ୍ଚିମବଙ୍ଗ, ବିହାର ଏବଂ ଉତ୍ତର ପ୍ରଦେଶ ପରି ପ୍ରମୁଖ ଚାଉଳ ଉତ୍ପାଦାନକାରୀ ରାଜ୍ୟରେ ହାରାହାରି ଠାରୁ କାମ ବର୍ଷ ହୋଇଛି । ଫଳରେ ଧାନ ଉତ୍ପାଦନ କମିବାର ଆଶଂକା ରହିଛି । ସରକାରଙ୍କ ଏହି ନିଷ୍ପତ୍ତି ପରେ ଏବେ ଦେଶରୁ ବିଦେଶକୁ ଚାଉଳ ରପ୍ତାନୀ ମହଙ୍ଗା ହେବ।
ତେବେ ଏହା ପୂର୍ବରୁ ଚାଉଳର ରପ୍ତାନୀ ଉପରେ କୌଣସି ପ୍ରତିବନ୍ଧକ ଲାଗୁ କରିବା ନେଇ କୌଣସି ଯୋଜନା ନଥିବା କେନ୍ଦ୍ର ସରକାର କହିଥିଲେ । ଘରୋଇ ଆବଶ୍ୟକତାକୁ ପୂରଣ କରିବା ପାଇଁ ପର୍ଯ୍ୟାପ୍ତ ବଫର ଷ୍ଟକ ଥିବା କେନ୍ଦ୍ର ସରକାର କହିଥିଲେ । ଉଲ୍ଲେଖଯୋଗ୍ୟ ଯେ, ଭାରତ ଦୁନିଆର ଦ୍ୱିତୀୟ ସବୁଠୁ ବଡ଼ ଚାଉଳ ଉତ୍ପାଦକ ଦେଶ । ଆର୍ଥିକ ବର୍ଷ ୨୦୨୧-୨୨ରେ ଭାରତ ୨୧.୨ ମିଲିୟନ ଟନ ଚାଉଳ ରପ୍ତାନୀ କରିଥିଲା।
ଏହା ପୂର୍ବରୁ କେନ୍ଦ୍ର ସରକାର ଗହମର ରପ୍ତାନୀ ଉପରେ କଟକଣା ଲାଗୁ କରିଥିଲେ। ଅନ୍ୟପଟେ, ଚିନି ରପ୍ତାନୀ ଉପରେ ମଧ୍ୟ କିଛି କଟକଣା ଲାଗୁ କରାଯାଇଛି।
