ବିଶାଖାପାଟନମ୍ର ନାଭାଲ୍ ଡକ୍ୱାର୍ଡରେ ଭାରତୀୟ ନୌସେନାରେ ସାମିଲ ହୋଇଛି INS-ସନ୍ଧାୟକ
ଭାରତୀୟ ନୌସେନାରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଉପସ୍ଥିତିରେ ବିଶାଖାପାଟନମ୍ର ନାଭାଲ୍ ଡକ୍ୱାର୍ଡରେ INS-ସନ୍ଧାୟକ କୁ ସେବାରେ ନିୟୋଜିତ କରାଯାଇଛି । ଏହି ନୂତନ ଜାହାଜ ଭାରତ ମହାସାଗର ଏବଂ ଭାରତ ପ୍ରଶାନ୍ତ ମହାସାଗରରେ ଏକ ମହାଶକ୍ତି ଭାବରେ ଭାରତର ଭୂମିକାକୁ ଆହୁରି ମଜବୁତ କରିବ । INS-ସନ୍ଧାୟକ ଜାହାଜର ପ୍ରାଥମିକ ଭୂମିକା ହେଉଛି ନିରାପଦ ସାମୁଦ୍ରିକ ନାଭିଗେସନ୍ ସକ୍ଷମ କରିବା ପାଇଁ ବନ୍ଦର, ନାଭିଗେସନ୍ ଚ୍ୟାନେଲ / ରୁଟ୍, ଉପକୂଳବର୍ତ୍ତୀ ଅଞ୍ଚଳ ଏବଂ ଗଭୀର ସମୁଦ୍ରର ସମ୍ପୂର୍ଣ୍ଣ ସ୍କେଲ ହାଇଡ୍ରୋଗ୍ରାଫିକ୍ ସର୍ଭେ କରିବା । ଏହାର ଦ୍ଵିତୀୟ ଭୂମିକାରେ ଜାହାଜ ବିଭିନ୍ନ ନୌସେନା କାର୍ଯ୍ୟ କରିବାକୁ ସକ୍ଷମ ହେବ ବୋଲି ପ୍ରତିରକ୍ଷା ମନ୍ତ୍ରଣାଳୟ ପକ୍ଷରୁ ଏକ ବିବୃତ୍ତିରେ କୁହାଯାଇଛି । SVL ପ୍ରକଳ୍ପ ଅଧୀନରେ ଦେଶରେ ନିର୍ମାଣ ହେଉଥିବା ଚାରୋଟି ଜାହାଜ ମଧ୍ୟରୁ ଏହି ଜାହାଜ ପ୍ରଥମ ଅଟେ । ଏହା ପ୍ରାୟ ୩,୪୦୦ ଟନ୍, ଲମ୍ବ ୧୧୦ ମିଟର ଏବଂ ଚଉଡ଼ା ୧୬ ମିଟର ବିଶିଷ୍ଟ ଜାହାଜ । ଏଥିରେ ସାଇଡ୍ ସ୍କାନ୍ ସୋନାର, ଡାଟା ଅଧିଗ୍ରହଣ ଏବଂ ପ୍ରକ୍ରିୟାକରଣ ପ୍ରଣାଳୀ, ଦୂରରୁ ପରିଚାଳିତ ଜାହାଜ ଏବଂ ଅନ୍ୟାନ୍ୟ ଉନ୍ନତ ମାନର ଜ୍ଞାନ କୌଶଳ ମଧ୍ୟ ଅନ୍ତର୍ଭୁକ୍ତ ହୋଇଛି । INS-ସନ୍ଧାୟକ କୋଲକାତାର ଗାର୍ଡେନ୍ ରିଚ୍ ସିପବିଲ୍ଡର୍ସ ଆଣ୍ଡ ଇଞ୍ଜିନିୟର୍ସ (GRSE) ରେ ନିର୍ମିତ କରାଯାଇଛି । ଏହି ପ୍ରକଳ୍ପକୁ ଭାରତୀୟ ନୌସେନାର ୱାରସିପ୍ ଡିଜାଇନ୍ ବ୍ୟୁରୋ ପରିଚାଳନା କରିଥିଲା । ଏହି ଅବସରରେ ଆଡମିରଲ ହରି କୁମାର କହିଛନ୍ତି,ନୌସେନାରେ ବିଭିନ୍ନ ପ୍ରକାରର ଅତ୍ୟାଧୁନିକ ପ୍ଲାଟଫର୍ମକୁ ଲଞ୍ଚ କରାଯାଇଛି । ଭାରତୀୟ ନୌସେନାର ସ୍ଵଦେଶୀ ବିମାନବାହକ ଜାହାଜ ଆଇଏନଏସ ବିକ୍ରାନ୍ତ, INS ଇମ୍ଫାଲକୁ ନୌସେନାରେ ସାମିଲ କରାଯାଇଛି । ଗତ ୧୦ବର୍ଷ ମଧ୍ୟରେ ନୌସେନାରେ ୩ଟି ସମ୍ପୂର୍ଣ୍ଣ ସ୍ଵଦେଶୀ ଯୁଦ୍ଧ ଜାହାଜ ଏବଂ ବୁଡ଼ାଜାହାଜକୁ ନୌସେନାରେ ନିୟୋଜିତ କରାଯାଇଛି ଯାହା ଭାରତୀୟ ନୌସେନାକୁ ଆହୁରି ଶକ୍ତିଶାଳୀ କରିଛି ।
