ୟୁଏସ ଓପନ ପରେ ଅବସର ଘୋଷଣା କରିପାରନ୍ତି ସେରେନା ୱିଲିୟମ୍ସ
କାଲିଫର୍ଣ୍ଣିଆ: ବିଶ୍ୱର ମହାନ ଟେନିସ୍ ଖେଳାଳି ସେରେନା ୱିଲିୟମ୍ସ ୟୁଏସ ଓପନ ପରେ ନିଜର ଅବସର ଘୋଷଣା କରିପାରନ୍ତି। ୪୦ ବର୍ଷୀୟ ସେରେନା ଇନଷ୍ଟାଗ୍ରାମରେ ଅବସର ନେଇ ସୂଚନା ଦେଇଛନ୍ତି। ସେ ଲେଖିଛନ୍ତି ଯେ ଜୀବନରେ ଏପରି ଏକ ସମୟ ଆସେ ଯେତେବେଳେ ଆମକୁ ଏକ ଭିନ୍ନ ଦିଗରେ ଆଗକୁ ବଢିବାକୁ ନିଷ୍ପତ୍ତି ନେବାକୁ ପଡେ | ତେବେ ସେ କେବେ ଆନୁଷ୍ଠାନିକ ଭାବେ ଘୋଷଣା କରିବେ ସେରେନା ଏପର୍ଯ୍ୟନ୍ତ ପ୍ରକାଶ କରିନାହାଁନ୍ତି। କିନ୍ତୁ ତାଙ୍କ ପୋଷ୍ଟକୁ ନେଇ ଚର୍ଚ୍ଚା ଚାଲିଛି ଯେ ସେ ୟୁଏସ୍ ଓପନ୍ ପରେ ଟେନିସରୁ ଅବସର ନେବେ। ନ୍ୟୁଜ୍ ଏଜେନ୍ସି ରଏଟର୍ସ ମଧ୍ୟ ରିପୋର୍ଟ କରିଛି ଯେ ଚଳିତ ମାସ ଶେଷ ଆଡକୁ ଆରମ୍ଭ ହେବାକୁ ଥିବା ୟୁଏସ୍ ଓପନ୍ ପରେ ସେରେନା ଟେନିସକୁ ବିଦାୟ ଦେବାକୁ ଯାଉଛନ୍ତି।
୨୩ଥର ଗ୍ରାଣ୍ଡସ୍ଲାମ ଚାମ୍ପିଅନ୍ ସେରେନା ଟେନିସରେ ଅନେକ ବଡ଼ ରେକର୍ଡ କରିଛନ୍ତି | ସେ କହିଛନ୍ତି ଯେ ସେ ଅବସର ଶବ୍ଦକୁ ପସନ୍ଦ କରନ୍ତି ନାହିଁ ଏବଂ ତାଙ୍କ ଜୀବନର ଏହି ସମୟରେ “ଟେନିସ୍ ବ୍ୟତୀତ ଅନ୍ୟ ଜିନିଷରେ ଉନ୍ନତି ଆଣିବାକୁ ଧ୍ୟାନ ଦେବାକୁ ଚାହୁଁଛନ୍ତି, ଏହି ଜିନିଷଗୁଡ଼ିକ ତାଙ୍କ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।” ସେରେନା ଇନଷ୍ଟାଗ୍ରାମରେ ଲେଖିଛନ୍ତି ଯେ,”ଜୀବନରେ ଏପରି ଏକ ସମୟ ଆସେ ଯେତେବେଳେ ଆମକୁ ଏକ ଭିନ୍ନ ଦିଗକୁ ଯିବାକୁ ସ୍ଥିର କରିବାକୁ ପଡିବ। ସେହି ସମୟ ସବୁବେଳେ କଠିନ ହୋଇଥାଏ ଯେତେବେଳେ ଆପଣ ତାହାକୁ ବହୁତ ଭଲ ପାଆନ୍ତି । ମୁଁ ଟେନିସକୁ ଉପଭୋଗ କରେ। କିନ୍ତୁ ବର୍ତ୍ତମାନ ଓଲଟା ଗଣନା ଆରମ୍ଭ ହୋଇଛି।
ମୋତେ ମା ହେବା ଉପରେ ଧ୍ୟାନ ଦେବାକୁ ପଡିବ। ମୁଁ ଆଗାମୀ କିଛି ସପ୍ତାହ ଉପଭୋଗ କରିବାକୁ ଯାଉଛି’। ଆସନ୍ତା ମାସରେ ୪୧ ବର୍ଷରେ ପାଦ ଦେବାକୁ ଯାଉଥିବା ସେରେନା ୭୩ଟି ସିଙ୍ଗଲ୍ସ ଟାଇଟଲ ଏବଂ ୨୩ଟି କ୍ୟାରିୟର ଡବଲ୍ସ ଟାଇଟଲ ଜିତିଛନ୍ତି | ସେରେନା ସାତଥର ଅଷ୍ଟ୍ରେଲୀଆନ ଓପନ୍, ତିନିଥର ଫ୍ରେଞ୍ଚ ଓପନ୍ ଏବଂ ୭ ଥର ୱିମ୍ବଲଡନ ଜିତିଛନ୍ତି। ଏହା ବ୍ୟତୀତ ସେ ଚାରିଥର ଅଲିମ୍ପିକ୍ ସ୍ୱର୍ଣ୍ଣ ପଦକ ମଧ୍ୟ ହାସଲ କରିଛନ୍ତି।
