ଜାପାନକୁ ଘେରିଲେ ରୁଷିଆ-ଚାଇନା, ୨୦ ଯୁଦ୍ଧ ଜାହାଜ ସାମୁଦ୍ରିକ ଅଞ୍ଚଳରେ ବୁଲୁଛି
ୟୁକ୍ରେନରେ ଚାଲିଥିବା ଯୁଦ୍ଧ ମଧ୍ୟରେ ରୁଷିଆ ଏବଂ ଚାଇନା ଜାପାନକୁ ଘେରିବା ଆରମ୍ଭ କରିଛନ୍ତି। ରୁଷିଆ ଏବଂ ଚାଇନାର ୨୦ଟି ଯୁଦ୍ଧ ଜାହାଜ ଜାପାନ ଏବଂ ଏହାର ଦ୍ୱୀପପୁଞ୍ଜର ସାମୁଦ୍ରିକ ଅଞ୍ଚଳରେ ବୁଲୁଛି। ଜାପାନର ସେନା ଏସବୁ ଯୁଦ୍ଧପୋତ ଉପରେ ନଜର ରଖିଛି । ଗତ ୪ ଦିନ ମଧ୍ୟରେ ଏହି ଅଞ୍ଚଳରେ ୪ ଟି ଚାଇନା ଯୁଦ୍ଧପୋତ ଏବଂ ୧୬ ଟି ରୁଷିଆ ଯୁଦ୍ଧପୋତ ପଇଁତରା ମାରୁଛି। ଏହି ଯୁଦ୍ଧପୋତଗୁଡ଼ିକ ପ୍ରଶାନ୍ତ ମହାସାଗରରେ ହନସୁ ଦ୍ୱୀପର ଦକ୍ଷିଣରୁ ପଶ୍ଚିମକୁ ଯାଉଛି।
ଜାପାନର ସୈନ୍ୟବାହିନୀ ପ୍ରଥମେ ଜୁନ ୧୨-୧୩ ରେ ପୂର୍ବ ଚାଇନା ସାଗରରେ ଯୁଦ୍ଧପୋତଗୁଡ଼ିକୁ ଚିହ୍ନଟ କରିଥିଲେ । ସେମାନଙ୍କ ସହିତ ଏକ ଇଲେକ୍ଟ୍ରୋନିକ ଗୁପ୍ତଚର ନୀରିକ୍ଷଣ ଯୁଦ୍ଧପୋତ ମଧ୍ୟ ସାମିଲ ରହିଥିଲା।ଦୁଇଟି ଚାଇନା ଯୁଦ୍ଧପୋତ ଉତ୍ତର ଦିଗକୁ ଯାଇ ସୋୟା ଷ୍ଟ୍ରାଇଟ ଦେଇ ପ୍ରଶାନ୍ତ ମହାସାଗର ମୁହାଁ ହୋଇଥିଲା। ସୋୟା ଷ୍ଟ୍ରେଟ ଜାପାନର ମୁଖ୍ୟ ହକ୍କାଇଡୋ ଦ୍ୱୀପକୁ ସାଖାଲିନ ଦ୍ୱୀପରୁ ଉତ୍ତରକୁ ପୃଥକ କରିଥାଏ। ସେହି ସମୟରେ, ଚକୋଟସ୍ ସାଗରରେ ଗୁପ୍ତଚର ଏବଂ ଇନ୍ଧନ ଯୋଗାଣ କରୁଥିବା ଏକ ଯୁଦ୍ଧପୋତ ପ୍ରଶାନ୍ତ ମହାସାଗର ଦେଇ ଗତି କରିଥିଲା।
ଜାପାନର ସୈନ୍ୟ ବିଭାଗ କହିଛି ଯେ ଫିଲିପାଇନ୍ସ ସାଗରରୁ ୫ ଟି ରୁଷିଆ ଯୁଦ୍ଧପୋତ ପୂର୍ବ ଚାଇନା ସାଗରରେ ପ୍ରବେଶ କରିଛି। ରୁଷିଆର ଯୁଦ୍ଧପୋତଗୁଡ଼ିକ ଜାପାନର ଓକିନାୱା ଏବଂ ମିୟାକୋଜିମା ଦ୍ୱୀପପୁଞ୍ଜ ଦେଇ ଗତି କରିଛି। ରୁଷିଆର ଯୁଦ୍ଧପୋତରେ ବିନାଶକାରୀ ଆଡମିରାଲ ପାଣ୍ଟେଲିଭ ପ୍ରୋଜେକ୍ଟ ୧୧୫୫ ଉଦାଲୋଇ ଶ୍ରେଣୀର ମାର୍ଶଲ କାରିଲୋଭ, କ୍ଷେପଣାସ୍ତ୍ର ସୂଚନା ପ୍ରଦାନକାରୀ ଉପକରଣ ଏବଂ ଅନ୍ୟ ତିନୋଟି ଯୁଦ୍ଧପୋତ ଅନ୍ତର୍ଭୁକ୍ତ ଥିଲା। ମାର୍ଶଲ କାରିଲୋଭକୁ ପ୍ରଶାନ୍ତ ମହାସାଗରର କମାଣ୍ଡ ଏବଂ କଣ୍ଟ୍ରୋଲ ସେଣ୍ଟର ଭାବରେ ସ୍ଥାନିତ କରାଯାଇଛି। ଗତ ବର୍ଷ ଆମେରିକାର ହାୱାଇ ଦ୍ୱୀପପୁଞ୍ଜ ନିକଟରେ ଏହି ଯୁଦ୍ଧପୋତ ମଧ୍ୟ ଦେଖାଯାଇଥିଲା।
ଏହା ବ୍ୟତୀତ ଅନ୍ୟ ୧୧ ଟି ରୁଷିଆ ଯୁଦ୍ଧପୋତ ଜାପାନ ନିକଟ ସମୁଦ୍ର ଅଞ୍ଚଳରେ ପାଟ୍ରୋଲିଂ କରୁଛି। ବିଶେଷଜ୍ଞମାନେ କହିଛନ୍ତି ଯେ ଯଦିଓ ଚୀନ ଏବଂ ରୁଷିଆର ଯୁଦ୍ଧପୋତ ଏକତ୍ର ପାଟ୍ରୋଲିଂ କରିବାର ସଙ୍କେତ ଦେଇ ନାହାନ୍ତି। ତଥାପି ଉଭୟ ଦେଶ ଜାପାନକୁ ନିଜର ଶକ୍ତି ପ୍ରଦର୍ଶନ କରିଛନ୍ତି। ତାଇୱାନ ଏବଂ କିଛି ଦ୍ୱୀପପୁଞ୍ଜକୁ ନେଇ ଚାଇନା ଏବଂ ଜାପାନ ମଧ୍ୟରେ ବିବାଦ ଲାଗି ରହିଛି। ଏଥି ସହିତ, କୁରିଏଲ ଦ୍ୱୀପପୁଞ୍ଜକୁ ନେଇ ରୁଷିଆ ଏବଂ ଜାପାନ ମଧ୍ୟରେ ତିକ୍ତତା ଦେଖାଦେଇଛି। ଆମେରିକାର ଜାପାନରେ ନୌସେନା ବେସ ଅଛି ଏବଂ ଚାଇନା ଦ୍ୱାରା ଆକ୍ରମଣ କରାଗଲେ ଏହା ପ୍ରଥମ ଆକ୍ରମଣର ଶିକାର ହେବ ବୋଲି କୁହାଯାଉଛି।
