ବଣ୍ଡ୍ ତଥ୍ୟର ସବିଶେଷ ରିପୋର୍ଟ ଦେବାକୁ ଏସବିଆଇକୁ କହିଛନ୍ତି ସର୍ବୋଚ୍ଚ ନ୍ୟାୟାଳୟ
ଏସବିଆଇକୁ ସୁପ୍ରିମକୋର୍ଟଙ୍କ ଭର୍ତ୍ସନା। ଇଲେକ୍ଟୋରାଲ ବଣ୍ଡ ଜରିଆରେ ଅର୍ଥ ଦାନ ମାମଲାରେ ଷ୍ଟେଟ ବ୍ଯାଙ୍କ ଅଫ ଇଣ୍ଡିଆକୁ ଭର୍ତ୍ସନା କରିଛନ୍ତି ସୁପ୍ରିମକୋର୍ଟ। ନିର୍ବାଚନ କମିଶନଙ୍କ ନିକଟରେ ଦାଖଲ କରାଯାଇଥିବା ବଣ୍ଡ୍ ତଥ୍ୟର ସବିଶେଷ ରିପୋର୍ଟ ଦେବାକୁ କହିଛନ୍ତି ସର୍ବୋଚ୍ଚ ନ୍ୟାୟାଳୟ।
ଅର୍ଥ ଦାନ କରାଯାଇଥିବା ବଣ୍ଡର ନମ୍ବର ପ୍ରଦାନ କରିବାକୁ ଏସବିଆଇକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ। ଏସବିଆଇ ପକ୍ଷରୁ ଦିଆଯାଇଥିବା ତଥ୍ୟ ଅସମ୍ପୂର୍ଣ୍ଣ ବୋଲି କୋର୍ଟ କହିଛନ୍ତି। କାହିଁକି ଏ ତଥ୍ୟ ଦିଆଯାଇନାହିଁ ଏ ନେଇ ଉତ୍ତର ରଖିବାକୁ ମଧ୍ୟ କହିଛନ୍ତି ସୁପ୍ରିମକୋର୍ଟ। ପ୍ରଧାନ ବିଚାରପତି ଜଷ୍ଟିସ ଡିୱାଇ ଚନ୍ଦ୍ରଚୂଡଙ୍କ ଅଧ୍ୟକ୍ଷତାରେ ନେଇ ଗଠିତ ୫ ଜଣିଆ ଖଣ୍ଡପୀଠ ଏହି ନିର୍ଦ୍ଦେଶ ଦେଇଛନ୍ତି।
ମାମଲାରେ ଆସନ୍ତା ୧୮ ତାରିଖରେ ହେବାକୁ ଥିବା ଶୁଣାଣିରେ ଏ ସମସ୍ତ ତଥ୍ୟ ପ୍ରଦାନ କରିବାକୁ ନିର୍ଦ୍ଦେଶ ରହିଛି। ଇଲେକ୍ଟୋରାଲ ବଣ୍ଡରେ ଥିବା ନମ୍ବରରୁ କିଏ କାହାକୁ କେତେ ଅର୍ଥ ଦେଇଛି ସୂଚନା ମିଳିପାରିବ। ୨୦୧୮ରେ ଇଲେକ୍ଟୋରାଲ ବଣ୍ଡ କେନ୍ଦ୍ର ସରକାର ପ୍ରଚଳନ କରିଥିଲେ। ଦେଶରେ ଯେ କେହି ଚାହିବେ ବଣ୍ଡ ଆକାରରେ ଅର୍ଥ ଦାନ କରିବା ନେଇ ବ୍ୟବସ୍ଥା ହୋଇଥିଲା।
ତେବେ ଗତ ମାସରେ ଏହି ବ୍ୟବସ୍ଥାକୁ ରଦ୍ଦ କରି ଦେଇଥିଲେ ସୁପ୍ରିମକୋର୍ଟ। ଅର୍ଥ ଦାନ ପ୍ରକ୍ରିୟାକୁ ଅସାମ୍ବିଧାନିକ କହିବା ସହ ବ୍ୟବସ୍ଥାକୁ ରଦ୍ଦ କରିଥିଲେ। ନିର୍ବାଚନ କମିଶନ ଅପଲୋଡ୍ କରିବାକୁ ତଥ୍ୟ ଜରୁରୀ ବୋଲି କହିଛନ୍ତି ସୁପ୍ରିମକୋର୍ଟ। ଏହି ମାମଲାରେ ପରବର୍ତ୍ତୀ ଶୁଣାଣି ଆସନ୍ତା ୧୮ ତାରିଖରେ ହେବ।
