ଆଜିଠୁ କିଛି ଗୁରୁତ୍ବପୂର୍ଣ୍ଣ ନିୟମରେ ବଡ଼ ପରିବର୍ତ୍ତନ: ଆୟକର ରିଟର୍ଣ୍ଣ ଦାଖଲ କଲେ ଦେବାକୁ ପଡ଼ିବ ଜରିମାନା
ନୂଆଦିଲ୍ଲୀ: ଆଜି ଅଗଷ୍ଟ ମାସ ୧ ତାରିଖ । ଆଜିଠୁ କିଛି ଗୁରୁତ୍ବପୂର୍ଣ୍ଣ ନିୟମରେ ବଡ଼ ପରିବର୍ତ୍ତନ ହୋଇଛି । କିଷାନ ସମ୍ମାନନିଧି ଯୋଜନା, ଆୟକର ରିଟର୍ଣ୍ଣ ଦାଖଲ ଓ ବ୍ୟାଙ୍କ ଅଫ୍ ବରୋଦା ଚେକ୍ ଦ୍ୱାରା ଦେୟ ପାଇଁ ହୋଇଥିବା ନିୟମରେ ପରିବର୍ତ୍ତନ ହୋଇଛି ।
ସବୁଠାରୁ ବଡ଼ କଥା ହେଉଛି ଏହି ନିୟମ ପରିବର୍ତ୍ତନ ଯୋଗୁ ଆୟକର ରିଟର୍ଣ୍ଣ କରୁଥିବା ବ୍ୟକ୍ତି ଅଧିକ ପ୍ରଭାବିତ ହେବେ । କାରଣ ବର୍ତ୍ତମାନ ଆୟକର ରିଟର୍ଣ୍ଣ ଦାଖଲ କଲେ ଦେବାକୁ ପଡ଼ିବ ୫୦୦୦ ଟଙ୍କା ଜରିମାନା । ଗତକାଲି ଆୟକର ରିଟର୍ଣ୍ଣ ଦାଖଲ କରିବାର ସମୟ ଶେଷ ହୋଇଥିବା ବେଳେ ଆଜିଠୁ ଏହି ନିୟମ ଲାଗୁ ହୋଇଛି । କାରଣ ସରକାରଙ୍କ ବିଜ୍ଞପ୍ତି ଅନୁଯାୟୀ ଜୁଲାଇ ୩୧ ତାରିଖ ଯାଏ ଆୟକର ରିଟର୍ଣ୍ଣର ଅବଧି ରହିଥିଲା । ଯାହା ଶେଷ ହୋଇଛି । ତେଣୁ ବର୍ତ୍ତମାନ ଆୟକର ରିଟର୍ଣ୍ଣ ଦାଖଲ କଲେ ୫୦୦୦ ଟଙ୍କା ଜରିମାନା ଦେବାକୁ ପଡ଼ିବ । ତାହାଛଡ଼ା ବାର୍ଷିକ ଆୟ ଯେଉଁମାନଙ୍କର ୫ ଲକ୍ଷରୁ କମ୍ ରହିଥିବ ସେମାନେ ୧୦୦୦ଟଙ୍କା ଦେବେ ବୋଲି ସୂଚନା ମିଳିଛି । ଯେଉଁମାନଙ୍କର ବାର୍ଷିକ ଆୟ ୫ଲକ୍ଷରୁ ଅଧିକ ରହିଥିବ ସେମାନେ ୫ହଜାର ଟଙ୍କା ଜରିମାନା ଦେବେ ।
ଅନ୍ୟପଟେ ପ୍ରଧାନମନ୍ତ୍ରୀ କିଷାନ ସମ୍ମାନନିଧି ଯୋଜନାରେ କିଛି ପରିବର୍ତ୍ତନ କରାଯାଇଛି । ବର୍ତ୍ତମାନ କେୱାସି ବିନା ଏହି ଯୋଜନା ଉପଲବ୍ଧ ହେବ ନାହିଁ । ପ୍ରଧାନମନ୍ତ୍ରୀ କିଷାନ ସମ୍ମାନନିଧି ଯୋଜନାର ଲାଭ ପାଇବାକୁ ହେଲେ ଏବେ ପଞ୍ଜୀକରଣ ସହିତ କେୱାଇସି କରିବା ବାଧ୍ୟତାମୂଳକ କରାଯାଇଛି । ପୁରୁଣା ହିତାଧିକାରୀଙ୍କୁ ଏଥିପାଇଁ ଜୁଲାଇ ୩୧ ତାରିଖ ଯାଏ ସମୟ ଦିଆଯାଇଥିଲା । ଯାହା ଗତକାଲି ଶେଷ ହୋଇଛି । ଯେଉଁ ହିତାଧିକାରୀ ମାନେ କେୱାଇସି କରିନାହାନ୍ତି ସେମାନେ ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ଯୋଜନାର ଦ୍ବାଦଶ କିସ୍ତି ପାଇପାରିବେ ନାହିଁ ।
ଆଜିଠାରୁ ବ୍ୟାଙ୍କ ଅଫ ବରୋଦା ଚେକ୍ ଦ୍ୱାରା ଦେୟର ନିୟମ ପରିବର୍ତ୍ତନ କରିଛି । ବର୍ତ୍ତମାନ ୫ଲକ୍ଷ କିମ୍ବା ଅଧିକ ଯାଞ୍ଚ ପାଇଁ ପଜିଟିଭ୍ ପେ ସିଷ୍ଟମ ବାଧ୍ୟତାମୂଳକ କରାଯାଇଛି । ଚେକ୍ ପେମେଣ୍ଟକୁ ସୁରଖିତ ରଖିବାକୁ ଏହି ନିୟମ କରାଯାଇଛି । ଠକେଇକୁ ରୋକିବାକୁ ଏପରି ପଦକ୍ଷେପ ନିଆଯାଇଥିବା କୁହାଯାଇଛି ।
