୪୪ ବିଲିୟନ ଡଲାରରେ ଟ୍ୱିଟର ଅଧିଗ୍ରହଣ ପାଇଁ ଏଲନ ମସ୍କଙ୍କ ପ୍ରସ୍ତାବ ସପକ୍ଷରେ ଶେୟାରଧାରକଙ୍କ ସହମତି
ଟ୍ୱିଟର ଏବଂ ଏଲନ ମସ୍କଙ୍କ ମଧ୍ୟରେ ବିବାଦ ଥମିବାର ନାଁ ଧରୁନାହିଁ । ଗୋଟିଏ ପଟେ ଏହି ଲଢେଇ କୋର୍ଟକୁ ଯିବା ନେଇ ଚର୍ଚ୍ଚା ହେଉଥିବା ବେଳେ ଅନ୍ୟପଟେ ଏହି ମାମଲାରେ ମଙ୍ଗଳବାର ଏକ ଗୁରୁତ୍ୱପୂର୍ଣ୍ଣ ଖବର ସାମନାକୁ ଆସିଛି । ଟ୍ୱିଟର ଶେୟାର ହୋଲ୍ଡର୍ସ ମଙ୍ଗଳବାର ଏଲନ ମସ୍କଙ୍କ ୪୪ ବିଲିୟନ ଡଲାର ପ୍ରସ୍ତାବରେ ରାଜି ହୋଇଛନ୍ତି ।
ରିପୋର୍ଟ ଅନୁସାରେ, ଦୀର୍ଘ ଦିନର ଆଲୋଚନା ପରେ ଟ୍ୱିଟର ଶେୟାର ଧାରକମାନେ ଟେସଲା ସିଇଓଙ୍କ ପ୍ରସ୍ତାବକୁ ଗ୍ରହଣ କରିଛନ୍ତି । ଏପ୍ରିଲରେ ପ୍ରତି ଶେୟାର ପିଛା ୫୪.୨୦ ଡଲାର ପ୍ରସ୍ତାବ ଦେଇଥିଲେ ଏଲନ ମସ୍କ । ଟ୍ୱିଟର ଅନୁସାରେ, ଡିଲ୍ ପକ୍ଷରେ ୯୮.୬ ପ୍ରତିଶତରୁ ଅଧିକ ଭୋଟ ପଡିଥିଲା।
କମ୍ପାନିର ନିବେଶକ ପ୍ରସ୍ତାବରେ ସହମତି ପ୍ରକାଶ କରିଛନ୍ତି, କିନ୍ତୁ ଏଲନ ମସ୍କ ଏହି ଡିଲ୍କୁ ନେଇ ଆଗକୁ ବଢିବାକୁ ଚାହୁଁ ନଥିବା ଦାବି କରାଯାଉଛି। ମସ୍କଙ୍କ ଦାବି ପୂରଣ ନ ହେବା ଯାଏ ଟ୍ୱିଟରକୁ କିଣିବା ପ୍ରସ୍ତାବ ଉପରେ ଆଗକୁ ବଢିବେନି ବୋଲି ଜଣା ପଡିଛି । ଟ୍ୱିରରକୁ କିଣିବା ପୂର୍ବରୁ ଏଥିରେ ଥିବା ଫେକ୍ ଆକାଉଣ୍ଟ ବାବଦରେ ସମ୍ପୂର୍ଣ୍ଣ ତଥ୍ୟ ଦେବା ପାଇଁ ମସ୍କ ଦାବି କରୁଛନ୍ତି ।
ଟ୍ୱିଟରେ ପ୍ରାୟ ୨୦ ପ୍ରତିଶତ ଫେକ୍ ଆକାଉଣ୍ଟ ଥିବା ଟେସଲା ସିଇଓ ତଥା ବିଶ୍ୱର ସବୁଠୁ ଧନୀ ବ୍ୟକ୍ତି ଏଲନ ମସ୍କ ଦାବି କରୁଛନ୍ତି । ଅନ୍ୟପଟେ ଏହି ସଂଖ୍ୟା ୫ ପ୍ରତିଶତ ଥିବ ବୋଲି କମ୍ପାନି କହୁଛି । ଯାହାକୁ ନେଇ ବିବାଦ ବଢିଥିଲା ଏବଂ ଜୁଲାଇରେ ଏହି ଡିଲ୍ରୁ ଓହରିବା ନେଇ ମସ୍କ ଘୋଷଣା କରିଥିଲେ। ପରେ ଟ୍ୱିଟର ଆଇନର ସାହାରା ନେଇ ଡିଲକୁ ପୂରା କରିବା ପାଇଁ ଏଲନ ମସ୍କଙ୍କୁ କହିଥିଲା।
