ନୀରଜ ଚୋପ୍ରାଙ୍କ ଆଉ ଏକ କମାଲ, ଫିନଲାଣ୍ଡରେ ଜିତିଲେ ସ୍ୱର୍ଣ୍ଣ ପଦକ, ବିଶ୍ୱ ଚାମ୍ପିଅନଙ୍କୁ ପଛରେ ପକାଇଲେ

ଟୋକିଓ ଅଲିମ୍ପିକ୍ସ ୨୦୨୦ର ସ୍ୱର୍ଣ୍ଣ ପଦକ ବିଜେତା ନୀରଜ ଚୋପ୍ରା ପୁଣି ଥରେ କମାଲ କରିଛନ୍ତି । ଫିନଲାଣ୍ଡରେ ଖେଳା ଯାଉଥିବା କୁଅର୍ତାନେ ଗେମ୍ସରେ ନୀରଜ ଚୋପ୍ରା ଶନିବାର ସ୍ୱର୍ଣ୍ଣ ପଦକ ଜିତିଛନ୍ତି । ନୀରଜ ଚୋପ୍ରା ଏଠାରେ ରେକର୍ଡ ୮୬.୬୯ ମିଟର ଜାଭେଲିନ ଫିଙ୍ଗି ତ୍ରିନିଦାଦ ଆଣ୍ଡ ଟୋବାଗୋର କେଶୋର୍ନ ୱାଲକଟ୍ ଏବଂ ବିଶ୍ୱ ଚାମ୍ପିଅନ ଗ୍ରେନେଡାର ଆଣ୍ଡରସନ ପିଟର୍ସଙ୍କୁ ପଛରେ ପକାଇ ସ୍ୱର୍ଣ୍ଣ ପଦକ ଜିତିଛନ୍ତି । ଚୋପ୍ରା ନିକଟରେ ନୂତନ ଜାତୀୟ ରେକର୍ଡ ସ୍ଥାପନ କରିଥିଲେ ।

ନୀରଜ ୮୬.୬୯ ମିଟର ଭାଲା ଫିଙ୍ଗି ଦମଦାର ଆରମ୍ଭ କରିଥିଲେ । ତାଙ୍କର ପ୍ରତିଦ୍ୱନ୍ଦ୍ୱୀଙ୍କୁ ପଛରେ ପକାଇବା ପାଇଁ ଏହା ଯଥେଷ୍ଟ ଥିଲା । ନୀରଜଙ୍କ ଦ୍ୱିତୀୟ ଏବଂ ତୃତୀୟ ପ୍ରୟାସ ବିଫଳ ରହିଥିଲା କାରଣ ସେ ତିନି ଥର ହିଁ ଭାଲା ଫିଙ୍ଗିଥିଲେ । ଏହା ସତ୍ୱେ ଭାରତୀୟ ତାରକା ଆଥଲେଟ୍ ନୀରଜ ନିଜର ପ୍ରଥମ ପ୍ରୟାସରେ ହିଁ ସ୍ୱର୍ଣ୍ଣ ପଦକ ଜିତିବାରେ ସଫଳ ହୋଇଛନ୍ତି । ୨୦୧୨ ଅଲିମ୍ପିକ ସ୍ୱର୍ଣ୍ଣ ପଦକ ବିଜେତା ୱାଲକଟ୍ ୮୬.୬୪ ମିଟର ସହିତ ରୌପ୍ୟ ଏବଂ ପିଟର୍ସ ୮୪.୭୫ ମିଟର ସହିତ କାଂସ୍ୟ ପଦକ ଜିତିଛନ୍ତି । ଟୋକିଓ ଅଲିମ୍ପିକ୍ସ ପରେ ୨୪ ବର୍ଷୀୟ ନୀରଜଙ୍କ ଏହା ଦ୍ୱିତୀୟ ଟୁର୍ଣ୍ଣାମେଣ୍ଟ । ସେ ଟୋକିଓ ଅଲିମ୍ପିକ୍ସରେ ଆଥଲେଟିକ୍ସରେ ସ୍ୱର୍ଣ୍ଣ ପଦକ ଜିତିବାରେ ପ୍ରଥମ ଭାରତୀୟ ହୋଇଥିଲେ ।

ନୀରଜ ଚୋପ୍ରାଙ୍କ ଏହି ସଫଳତାରେ କ୍ରୀଡା ମନ୍ତ୍ରୀ ଅନୁରାଗ ଠାକୁର ବେଶ ଶତମୁଖ ହୋଇ ଉଠିଛନ୍ତି । ସେ ନୀରଜ ଚୋପ୍ରାଙ୍କ ଭିଡିଓ ଟୁଇଟ୍ କରିଛନ୍ତି । ଲେଖିଛନ୍ତି ନୀରଜଙ୍କୁ ସ୍ୱର୍ଣ୍ଣ ପଦକ ମିଳିଛି । ପୁଣି ଥରେ ସେ କମାଲ କରିଛନ୍ତି । ଏହା ପୂର୍ବରୁ ନୀରଜ ଫିନଲାଣ୍ଡରେ ଜାତୀୟ ରେକର୍ଡ ନିଜ ନାମରେ କରିଥିଲେ । ଏଠାରେ ଅନୁଷ୍ଠିତ ପାଭୋ ନୁରମୀ ଖେଳରେ ନୀରଜ ଚୋପ୍ରା ରୌପ୍ୟ ପଦକ ଜିତିଥିଲେ । ସେ ୮୯.୩୦ ମିଟର ଜାଭେଲିନ ଫିଙ୍ଗି ନିଜର ଜାତୀୟ ରେକର୍ଡ ଭାଙ୍ଗିଥିଲେ ।